Kunanzwe usuku lokukhumbula abalambayo emhlabeni jikelele ngoLwesithathu, olweWorld Food Day, uzulu weZimbabwe ekhala ngendlala njalo lenhlanganiso yeWorld Food Program (WFP) isithi iyehluleka ukuthola imali eyaneleyo yokuselela abantu abayizigidi ezingamatshumi phose amathathu, 27 million, abahlaselwe yindlala emazweni atshiyeneyo asezansi yezwekazi leAfrica.
Isikhulumeli seWFP uMnu Thomson Phiri utshele umhlangano weUnited Nations oqhutshelwe eGeneva, kweleSwitzerland, ukuthi phakathi kwemali eyizigidi ezingamakhulu phose amane zamadola eMelika edingakalayo, US$369 million, sebethole izigidi ezedlula kancane amatshumi ayisikhombisa kuphela, US$73, 8 million.
UPhiri uthe indlala isigxile impanda emazweni asezansi yeAfrica agoqela eleZimbabwe, Lesotho, Malawi, Namibia, leZambia, okwenze ohulumende balawamazwe bacela uncedo oluphuthumayo.
"Ngaphandle kokuthi sithole olunye usizo, izigidi zabantu zisengozini enkulu," kutsho uPhiri.
EZimbabwe iWFP ithi abantu abalambayo bayizigidi phose eziyisitshiyangalombili, 7, 7 million, abadinga ukuphathiswa ngokudla.
I-WFP iphakathi kokwabela abalambayo ukudla ezigabeni zeZimbabwe ezitshiyeneyo incedisana lohulumende lezinye inhlanganiso ezifana leUSAID.
Uhulumende weMelika yena wazise ukuthi lonyaka, usekhiphe izigidi ezedlula kancane amatshumi ayisithupha, US$62 millon, yokuselela uzulu weZimbabwe olambayo.
Isiphathamandla senhlanganiso esebenza lozulu wemaphandleni enyakatho yeMandebeleni eyeRural Communities Empowerment Trust uMnu Vumani Ndlovu utshele iStudio 7 ukuthi isimo sendlala sesisibi kakhulu emakhaya.
"Lolu lusuku oluqakatheke kakhulu," kutsho uNdlovu ekhuluma ngeWorld Food Day. "Kulusuku lapho inkokheli yelizwe emele icabange khona ngabantu beZimbabwe abathwele nzima ngendlala."
Your browser doesn’t support HTML5
Ingxoxo loMnu Vumani Ndlovu