Inhlanganiso ezitshiyeneyo namhla ziphatheke kuhlelo lokubutha izibi endaweni yamavinkili ye Budiriro One, njengesibonelo sokunanza usuku oluqakathekisa ilungelo lomntwana wezwekazi le Africa ele “ The Day Of The African Child ” elinanzwa kuzwekazi le Africa mhla zilitshumi lasithupha kunyanga kaNhlangula – 16 June. Intathelizindaba yethu uMavis Gama usethulela loludaba ngokugcweleyo ese Harare.
Yingoma yelizwe leyo ebihlatshelwa ngabantwana besikolo abagoqela inkokheli ku Junior Council yeHarare lezifundi ze Budiriro Christian College, abohlangothi lukahulumende olubona ngezokulondolozwa kwemvelo, olwe Environmental Management Agency kanye lolukamanisipala weHarare olubona ngezokubuthwa kwezibi yibo kade bekulumkhosi eBudiriro One.
UMayor wabontanga kumanisipala we Harare, osathatha izifundo ze Form Six, e Churchill Boys High School, u Junior Councillor Ebenezer Mabela, obengumhlonitshwa kulumkhosi, uthi bakubone kufanele ukuba bakhuthaze ontanga abanjengabo ukuba babolondoloza indawo abahlala kizo ngasikhathi sinye kunanzwa lolusuku olwakhethwa ngemva kokubulawa kwabantwana besikolo kwele South Africa.
UJunior Councillor Mabela wengeze wathi lumsebenzi bakhethe ukuwukhokhela bona ukuze kube lula kwabanye babo, ukwamukela lokho abakukhankaselayo, okuphezu kokulondolozwa kwezabelo abahlala kizo zihlanzekile.
UMabela ukhuthaze uzulu wonke ukuba abozibeka umlandu wokulondoloza lezondawo bahlala kizo zihlanzekile.
U councillor wesigaba esihlanganisa iBudiriro le Glenview kumanisipala wabantwana lo, uElizabeth Vela utshele intathelizindaba ukuba baphatheke kulomkhosi walamuhla ukukhumbuza abadala phezu kokuqakatheka kokulondoloza imvelo yabo kanye lendawo lapho abahlala khona.
Unkosazana Bester Moyo, osebenza kunhlanganiso ye JFC, njengeqgwetha elisafundela umsebenzi) emzini weBudiriro, uveze ukuba kungani njengenhlanganiso,bekubone kufanele ukuba khona kwabo emkhosini lo.
UMaMoyo uthi asekunanzelele kuminyaka elitshumi lambili ( 12 years ) esebenze lozulu wemzini waseBudiriro linani lendaba zokudlwengulwa kwabantwana eziphuma kakhulu zivelela ezikolo lasemapholiseni.
Abasakhulayo laba babhode bebutha izibi kundawo ezintathu kulomuzi waseBudiriro okubalisa khona emavinkilini eBudiriro One, two le five. Izifundi ezivele kuzikolo ezehlukeneyo ezikulomuzi ziphatheke kulomkhosi.
Bebekhona abekade belibazisa uzulu ngendlela ezehlukeneyo okubalisa ama Drum Majorates amantombazana avele e Budiriro One High School kanye lechoir yamantombazane afunda e Budiririro Christian College.
Abenhlanganiso ezehlukeneyo ezisebenzelana labantwana okubalisa eye Justice For Children, ukusebenzisa lumbuthano ukubafundisa phezu kokuqakatheka kokutsho lapho behlukuluziwe labo bebekhona.