Inhloko kahulumende uMnu Morgan Tsvangirai sexwayise ukuthi kulakho ukuba lokufuthelana okukhulu kwezombusazwe hatshi eZimbabwe kuphela kodwa lemazweni angcelelane lalelilizwe kungaba lokuphikisana phezu kwempumela yokhetho oluzayo.
UTsvangirai wethule amazwi la ekhuluma labakhokheli benhlanganiso ezizimeleyo kweleMelika ngempelaviki.
Wengeze wathi udlakela oluke lwabonakala kweleIvory Coast lulakho ukuqhamuka eZimbabwe nxa uMongameli Mugabe enganqotshwa abesesalela esihlalweni.
Ekhuluma emkhosini munye uMnu Jesse Jackson odume ngokulwela amalungelo abensundu kweleMelika, ukhuthaze ukuba ukhetho oluzayo eZimbabwe luqhutshwe ngokuthula.
Isikhulumeli sikaTsvangirai uMnu Luke Tamborinyoka uthi uTsvangirai ufuna amazwe omhlaba aphathise ekuvimbeni udlakela ngaphambilini kokhetho.
Kodwa umkhokheli weZanu PF edale lephalamende uMnu Joram Gumbo uthi imbiko kaTsvangirai itshekile njalo ayakhi isizwe.