Uhlangothi lwebhanga elikhulu eleReserve Bank of Zimbabwe olubona ngokusetshenziswa kanye lesisindo semali yelizwe lukhangelelwe ukuba luzaqhuba umhlangano ngoLwesihlanu owokuhlolisisa ukugugudeka kweZimbabwe Gold (ZiG).
Lokhu kwenzakala ngesikathi abaqondisi bamabhizimusi amanengi amakhulu besithi ukugugudeka kweZiG kulakho ukwenza ukuba bevale amabhizimusi abo ngoba babanjwa ngamandla ukuthi besebenzise imali le ephephukayo.
Uhlangothi lweMonetary Policy Committee lukhangelelwe ukuqhuba umhlangano lo ngesikhathi kulokufuthelana kumabhizimusi athi akusasebenzeki ngenxa yokugugudeka kweZiG.
Okwamanje idollar leMelika lithenga amaZiG afika phose itshumi lane – 13.98 emkambo kahulumende kuthi emkambo wensitha lithenga amatshumi amathathu – 30 ZiG.
Amabhizimusi aphansi kwenhlanganiso yeRetailers Association of Zimbabwe akhala ngokubanjwa ngamandla ukuba athengise impahla ngemali le agoqela iSpar, Truworths, Edgars, OK Zimbabwe, TM Pick n Pay lamanye. Athi akusathengiseki impahla ngoba seligugudeke okumangalisayo iZiG.
UMnumnzana Persistence Gwanyanya ilunga lekomithi leRBZ Monetary Policy Committee uthi umhlangano abazawuqhuba ngoLwesihlanu uzahlolisisa izikhalazo zabosomabhizimusi lozulu ngokugugudeka kweZiG.
“Siyafisa ukuthi kubuyele esimeni esihle ngokuphangisa. Ngakho ke, idale lemali lebhanga lelizwe ele Monetary Policy Committee liyahlala phansi ngoLweSihlanu ukuthi likhulume ngendaba zomnotho welizwe. Kulezinto njalo abazikhangelayo ukuthi bebone ukuthi intengo yemali yelizwe lokhe isasenhle na. Konke lokhu Kuyadingeka ukubana babe lembono abaphuma lawo. Ngibona umbuzo wokuthi ‘Kuyini okungenziwa esikhathini esifitshane’? Kuzaphuma ngolwesihlanu idale selihlezi phansi.”
UMnumzana Innocent Tapiwa Marimo, umqondisi wenhlanganiso eyeConfederation of Zimbabwe Retailers, uthi benze umhlangano ngoMvulo lomsekeli kaMongameli uMnu. Constantino Chiwenga lophethe uhlangothi lukahulumende olubona ngezamabhizimusi uMnu. Mangaliso Ndlovu abavume ukuba iZiG isiwe isisindo okumangalisayo. UMarimo uthe isikhalazo sabo esikhulu kuhulumende yikuba basebenzise isilinganiso sokutshintsha imali esifakwa ngumkambo wemali ukuze labo bathole inzuzo njalo lentengo yempahla ingahlali ikhuphuka njalo nje.
“Uhlupho olukhulu esilalo khathesi yisisindo semali esingavumeliyo ukuthi sithole imali zethu esizisebenzisileyo. Sisebenza labasithengisela impahla ngedola leMelika, kodwa inzuzo yethu siyithola ngemali yalapha okuba luhlupho nxa sesidinga ukuyathenga ezinye impahla. Nxa sesithenga njalo sithenga impahla ezinengi ngedola, isilinganiso esingamatshumi ayisitshiyangalombili ekhulwini kuqathaniswa lamatshumi amabili ekhulwini ngeZIG. Kumbe ngentengo ephezulu kakhulu nxa uthenga ngemali yakuleli. Lesisimo senziwa sibe sibi ngumthetho osenqabelayo ukufaka intengo ephezulu kwesilinganiso sokutshintsha imali esifakiweyo emthethweni.”
Ziyakhala izisebenzi labahlali bakoBulawayo abathi iZiG isiwe isisindo okokuthi isiphose ifane lemali yohlobo lwe-bond eyalahlwa ekuqaleni komnyaka lonyaka. UNkosikazi Sihle Mlawuzi ngomunye wabo.
"Okukhona yikuthi ama prices ayabhalwa nge USD eshop, nxa ungabuza ukuthi irate yenu yeZIG ngubani bazakutshela ukuthi abala rate kulama prices awe ZiG. Ufika utshiya okunye ku till ngoba i price ye ZIG iyabe iphezulu kakhulu. This month uyathenga impahla ngeZiG olifunayo akula limit kodwa iprice kuphela izakwenza utshiye izinto. Ngikhuluma kunje i2litres ye cooking oil yiZiG$107 kodwa ngeUSD iyabe iyi $3, ukuthi kusetshenziswa rate bani asazi. Sesibuyelile kuhlupho lwama bond notes, okubuhlungu yikuthi uhulumende kafuni kuvuma ukuthi seyehlulekile.”
UMnu. Anthony Majongosi umgcinisihlalo wenhlanganiso yabongi eyeZimbabwe Nurses Association koBulawayo uthi intengo yempahla iqonge kakhulu ngenxa yokugugudeka kwesisindo seZiG.
“Sibona izinto sezikhwelile ema shops, sihololile kodwa ke imali yethu ayisakwani ngitsho lokuthi sithenge ama groceries. Siyakhuthaza igovernment ukuthi inanzelele ukuba iZiG alisasebenzi, nxa kungasetshenziswa ama USD kungaba ngcono. Irate yeZiG isiphezulu kakhulu okwenza ukuba labathengisayo labo bakhweze izinto.”
UMnunzana Stevenson Dlamini ingcwethi kwezomnotho esebenza eNational University of Science and Technology uthi kunengi okungenziwa ukuze kumiswe ukugugudeka kweZiG.
“Indlela yokubana siqede uhlupho esesiphakathi kwalo yikubana nxa sifaka isisindo semali yethu asisiqathanise lalokhu okuthiwa yi open market. Ukuze leyi iphumelele kuhle yikuthuthukisa ukukhula kwamabhizimusi ngokufaka indlela ezenza kube lula ukuqala amabhizimusi. Okunye njalo kwenziwe impahla kwelakithi, okuzenza ukubana singabi lesidingo sokuthi seyame kumali yangaphandle.”
Ngesikhathi iZiG isethulelwa uzulu ngoMabasa lonyaka, idollar leMelika lalithenga amaZiG edlula kancane itshumi lantathu – 13.2 emkambo kahulumende. Phakathi kweminyaka elitshumi lanhlanu, uhulumende sewethulela uzulu imali etshiyeneyo ukwenzela ukuthuthukisa umnotho. Ingcwethi kwezomnotho zithi konke lokhu kwaphelela emoyeni.
SEE ALSO:
Udaba Esilwethulelwe NguBathabile Masuku