Izizalwane zeZimbabwe ezisebenza kweleSouth Africa zethula injabulo exubene lokudana ngokuya ekhaya ukuyathakazelela ikhefu leKhisimusi lezihlobo labangane.
KwabeZimbabwe abanengi abasebenza kweleSouth Africa isibotshiwe imithwalo, kuthi abanye amabombo avele eselubhekise ekhaya kanti abanye vele sebekhonale ukuyathakazelela iKhisimusi lezihlobo labangane. Isizalwane seZimbabwe uMnumzana Greatman Mkhwebu uthi liyathi liphuma elangoLwesithathu esesemzini wakhe eTshangwa ePlumtree.
“Mina isizatho sokuthi ngiye ekhaya yikuthi veke ma ukhulele emakhaya wazalelwa emakhaya akumelanga ukhohlwe ma usemsebenzini kudiaspora ukuthi ikhaya likhaya. Ukhumbule abantwana, ukhumbule umdeni, ukhumbule izihlobo. Kumanjenje ngikhuluma abantwana besebevele bewatsapa ubusuku lemini bethi baba ubuyanini. So labo ba excited kakhulu ngoba ubaba ubuya ekhaya.”
Njengokwenziwa emizini yonke, uthi usevele wathola umlayezo oqinileyo ovela kundodakazi yakhe uJennipher Junior uPuntshuPuntshu uMuntuza, emtshela ukuthi bamlinde ngabomvu.
“Baba libuye ekhaya. Lingahlali eGoli. Lisiphathele ukudla, lezicathulo, lezi school shoes, lengwane yesun hat. Lingithengele lamagogorosi.
UNkosazana Pamela Ncube laye uthi ulubhekise ekhaya koGodlwayo uMahlabayithwale lobanje kungathi lizaba munyu kakhulu leliKhisimusi.
“Ukuyanyathela ekhaya lakho yisibusiso. Yinto nje esengiyifosela manje kodwa hayi so far umnyaka ubunzima kakhulu. Yikho okungenza ngithi ithi ngiyenyathela ekhaya mpela coz may be kungavuleka mpela khonukhuya ukuthi lawe ukulale ukhothwa yizinyanya zangakini.”
UNkosazana Sithembinkosi Sikhosana yena uthi udane kakhulu njengoba engasoze enelise ukuyabona izihlobo eMatobo ngelanga leKhisimusi.
“Mina isizatho yikuthi ngiyasebenza. Kodwa sithi abahambileyo, Khisimusi enhle lomnyaka omutsha obuyayo omuhle. Liphephe phela emgwaqweni bomkhaya. Nxa umuntu esizwa esediniwe akapake imoto alale.”
Banengi njalo abafisa ukuya ekhaya kodwa baxakwe yisimo semali. Isizalwane seZimbabwe umnumzana Godfrey Viki uthi bangalahli ithemba kanti njalo ufisela imuli yakhe iKhisimusi elitshukela kibo ekhaya eSilobela.
“Makwehlule bakithi kwehlule. Mina nginguGodfrey Viki ngithi lonyaka kwehlule angikwazi ukuphumelela ngiye ekhaya. Ngithi Khisimusi enhle bantu bakithi. Ohambileyo ahambe kahle. Oseleyo lawe ngapha sala kahle ungaze wazithola usencindezini ukuthi hayi bahambile mina ngiyehluleka. Awehlulekanga izikhathi azifani.”
AbeZimbabwe laba bafisela abantu bonke iKhisimusi ehlabusayo babuye baxwayise njalo abahambayo besithi ukujaha akusokufika, kanti njalo kwabaphuza okudakayo bathi ikusasa liyabekelwa.