Ngqwele Dube
Abanye abatsha abahlala koBulawayo bathi baphila ngokukhanda amatafula, ukukhanda imigubazi lokunye ngenxa yokuswelakala kwemisebenzi kubelabanye njalo asebephelelwe lithemba asebenatha utshwala okumangalisayo, abathatha izidakamizwa lokucela ukudla emphakathini.
UCottesmore Mchonge oleminyaka yokuzalwa engamatshumi amabili lasithupha - 26 uthi wabona ukuthi akusizi ukuhlala endlini ngenxa yokuswelakala kwemisebezi eZimbabwe ngakho-ke wafundiswa ngabanye abantu umsebenzi wokubaza ngo2022 wahle waqina kikho Ubaza amatafula lokunye eseNjube Projects Centre.
“Sabona ukuthi impilo is very hard sathi mana sibamba bambe sifundele ukubaza sibone ukuth impilo iyangaphi. Ngyakhona ukuyenza $200 kusiya ku$300 ngenyanga"
Ukhanda insimdi ezimlethela inzuzo ekupheleni kwenyanga
Balihlekana abatsha ababaza izitulo, amatafula lokunye endaweni le. UTrymore Moyo uthi waqalisa ukubaza ngoNhlangula lonyaka esephelelwe ngumsebenzi.
“Loba imali ingekho inengi kakhulu lapha kungcono kulokuhlala endlini ngoba siyathola okokudla."
UMthokozisi (surname) oleminyaka yokuzalwa engamatshumi amabili lasithupha - 26 uthi seleminyaka emibili ekhanda insimbi. Ukhanda amagedi, insimbi zamafasitela, ezeminyango lokunye okuthengwa nguzulu.
Uthi njengabanye bakhe, kwesinye isikhathi uyathola amakhhulu amathathu amadollar eMelika - US$300 ngenyanga ekukhandeni okutshiyeneyo.
Okunye okubazwa ngabatsha eZimbabwe
"Ngabona kuqakathekile ukuba ngivuke lami ngiyenze okunye loba kunginika imali encane, ngibona kungcono kulokuhlala."
Ogezisa izimota eLuveve emavinkilini akoChigumira eLuveve, uGarfield Maseko, uthi wenelisa ukugezisa izimota ezilitshumi kusiyafika itshumi lanhlanu - 15 ngelanga njalo ubhadalisa amadollar eMelika amane - $4 kumbe $10 kusiya ngohlobo emota.
"Imsebenzi ayitholakali ngakho ngabona kungcono ukuthi ngibuye ngizo dinga imali ekugeziseni izimota"
Kodwa bakhona abatsha abakhala okumangalisayo abatshona bebhodabhoda bedinga utshwala lezadakamizwa koBulawayo lezinye indawo eZimbabwe. Kulabanye njalo abadinga imisebenzi nsukuzonke. UMartin Nyoni ohlala Emakhandeni uthi sekuleminyaka emibili waphutsha izifundo esikolo semfundo yaphezulu. Uthi kayitholakali imisebenzi eZimbabwe.
"Kunzima lapha sitshona sihleli loba ungafaka iapplication yomsebenzi awuphendulwa nxa ungela connection."
Abatsha babaza amakhabothi lokunye koBulawayo
Uthwele nzima loThabo Jele ohlala eLobengula West.
"Impilo yokuba ngulova ibuhlungu ngoba sigcina singena etshwaleni abanye bebhema igwayi ngenxa yokuswela imisebenzi ngoba uyabe utshona uhlezi. Ubutsotsi sobuyanda emalokitshini ngoba abantu abasebenzi bayalamba ungakhangela abanye abantu loba bengahambanga emngcwabeni uyafika elayine ukudla ngenxa yokuthi uyabeswele ukuthi uyadlani."
UBongani Gumede laye ohlala eLobengula West uthi loba ewazi umsebenzi wamagetsi lapho ayesebenza khona wamiswa ngakho sevukela ezitolo okunathwa khona intshengu, lokunye.
"Ungafika ekuseni lapha uyathola amajida ehleli emelele ama shop ukuthi avulwe ukuthi bathenge utshwala. Kungayisikho ukuthi sitshontshile kodwa sifuna ukunatha ukuthi sikhohlwe"
Kulamafekithali amanengi eZimbabwe avalwa kubangelwa yisimo esibi somnotho. Uhulumende uthi abatsha kumele bevuke bezenzele ngoba ilizwe lakhiwa ngabanikazi balo