Kulabatsha eZimbabwe abasebenzisa imitshina elobungcitshi obuphezulu ukwenza imisebenzi etshiyeneyo eyayisenziwa ngabantu, okubizwa ngokuthi yiArtificial Intelligence, kubelabanye njalo abathi kabakayifinyeleli.
Banengi abasakhulayo, ikakhulu abasemadolobheni, abathi basebenzisa iArtificial Intelligence eZimbabwe. Omunye othakazelela lokhu nguZeluleko Zet Moyo ohlala koBulawayo.
"Iyancedisa ukuthi umuntu athole imfundo ehambela lokuthi ungumuntu onjani. Nxa wena ungusomabhizimusi, iyakusiza ekuthini ungamemethekisa okucacileyo, njani lokhu okuthengisayo. Sikhangela kwezempilakahle, umuntu omutsha sesenelisa ukuthola usizo ngokuphangisa encedwa yiyo iA.I, ngoba ikhona imitshina exoxisana laye, imsiza ngalokhu eyabe ekufuna."
Banengi abalombono lo labanye abasola iArtifical Intelligence besithi ilakho ukusetshenziwa ngendlela ezingaqondanga. UNolwazi Ncube wakoBulawayo uyayisola kakhulu i-A-I.
"Endabeni zokufunda, abafundi sebelobuvila ngoba babhalelwa imisebenzi yesikolo yonke bona bezihlalele. Kutsho ukuthi loba besiyaphutsha izifundo zabo, emakhanda kungaba kungelalutho, okwenza ukuthi isimo semfundiso yethu njengelizwe, ibe phansi. Kuthi njalo, iArtificial Intelligence leyi isithathela abantu imisebenzi yabo ngoba sokusebenza imitshina yakulezinsuku ukwenza lokho okwakusenziwa ngabantu. Yikho ngisithi yikuthuthuka kodwa kuyasiphazamisa empilweni zethu lokhu."
ULydia Banda, osebenza kunhlanganiso eyeWomen's Institute for Leadership Development, uthi yebo izinto sesiguquka emhlabeni wonke jikelele kodwa akumelanga abantu besebenzise okwamanje iArtificial Intelligence.
"Ngokubona kwami, yebo inhle indaba yeA.I kodwa isebenza emazweni alomnotho othuthukileyo. Okwakhathesi, njengelizwe silokunengi okumele siqale sikulungise ukuze sihambelane labanye kule indaba- okufana lokulungisa imitshina lokunye okufunakalayo ekusebenziseni iA.I. Imali iyafunakala njalo eyokuthenga izinto ezifana leData elokusebenzisa amagagasi eInternet. Sisasemuva ngakho ngibona ingathi ingxenye eminyakeni elitshumi kusiya phambili, yikho lapho esingathi khona sesiyifuna leyi Artificial Intelligence."
Kuyini iArtificial Intelliegence? UMnu. Mbulisi Ndlovu ofundisa ekolitshini lemfundo yaphezulu eLupane State University, uthi iA-I yenza engani imitshina ilengqondo njengabantu.
"IArtificial Intelligence yikulungisa imitshina elamaComputer ukuze iyenze imisebenzi eyenziwa ngabantu, sokukhanya ingathi imitshina leyi ilengqondo kumbe iyacabanga njengabantu. Nxa sisebenzisa imitshina sikwenzela ukuthi izinto ezinengi zibe lula, ukwenzela ukuthi singaginqi njengabantu ekwenzeni izinto."
Umphathintambo obona ngezemitshina yakulez’insuku, uNkosikazi Tatenda Mavetera, usanda kutshela amalunga edale lephalamende ukuthi uhulumende uphakathi kokulungisa umthetho ozalawula ukusetshenziswa kweArtificial Intelligence eZimbabwe.
"Njengohulumende sibona ingathi ukusetshenziswa kwemitshina ngaleyi indlela kuhle, njalo siyakusekela. Osokusele yikuthi kubekwe imithetho ezanceda uzulu ukuze asebenzise leyi A.I ngendlela eqondileyo. Lokhu yikho esesikwenza."
UNdlovu uphinde wathi kumele abantu beqaphele indlela abasebenzisa ngayo iArtificial Intellegence ngoba ilakho ukubaphazamisa, ikakhulu ngesikhathi kungakabunjwa umthetho olawula ukusetshenziswa kwayo eZimbabwe.
"Ngenxa yokuswelakala kwenhlanhla, zivele zikhona izigangi ebantwini, ikakhulu bonaba abatsha abasesiba ngamavila ngenxa yeA.I leyi. Sebethatha imisebenzi yabanye yesikolo besebenzisa ubungcitshi beArtificial Intelligence. Abanye njalo sebedala amacala wokutshontsha besebenzisa iA.I. Kuthi njalo, ikhona okuthiwa yiPhotoshop lapho isithombe somuntu singatshintshwa okuzwayo, ekhanye ingathi engaba kade esendaweni akade engekho khona. Abasakhulayo kumele bengahugeki ukwenza lokhu."
Loba kukhona okubi okungalethwa yiArtificial Intelligence, ezinye ingcwethi ezisebenza labatsha zithi abasakhulayo kabasoze bekubalekele lokhu kodwa kumele bekusebenzise ngedlela eqondileyo.
SEE ALSO:
Udaba Esilwethulelwe NguTobias Mudzingwa