Benza santambo abanye abantu koBulawayo loba sokulabantu abalomkhuhlane weCoronavirus eZimbabwe.
Isakhamuzi sakoBulawayo, uMnu. Mnyaradzi Phiri, uthi okwenza abantu benze abakujayeleyo yikuthi kukhanya engani kunengi okufihlwa nguhulumende.
“Umkhuhlale lo weCoronavirus kungani ufihliwe lapha. Akula information esiyitholayo. Kungani yisecret, kuyafihlwa ukuthi kungabonakala ukwehluleka kwama authorities. Kodwa siku risk. Lakhathesi ungakhangela lokhe kuyi day to day business kungani akula lutho olwenzakalayo.”
Imibono yakhe isekelwa nguNkosikazi Sizwakele Moyo, othengisa impahla emigwaqweni.
“Nginjenje ngiyakhwehlela, sengesaba ngithi kumbe yiyo ivirus ngoba asikwazi lokuthi itshaya njani, iyenza njani, ama symptoms ayo lokhe singakabi lolwazi ngakho. Lokhe sisenza izinto zethu esasivele sizenza. Siyathengisa emsikeni sikuma open space. Akula lutho olutshintshileyo.”
Banengi abazenzela santando edolobheni leli. Omunye wabo nguNkosikazi Nosizo Mpala.
“Asikezwa lutho ngeCorona njalo siyaziphila as normal impilo yethu yansuku zonke. Angazi kumbe singatshintsha ukwenza kwethu. Sisebenzise ama sanitizer kodwa lokhe singakezwa lutho.”
Bakhona asebenanzelele ukuthi bengenza imali ethe xaxa ngenxa yomkhuhlane lo. UMnu. Ngqabutho Ncube, othengisa okutshiyeneyo edolobheni leli, uthi kulempahla engasatholakali kwamanye amazwe okwenza ukuthi bakhuphule intengo yayo.
“Izinto esizithengisayo sezikhwela ngenxa yokuthi abantu sebezithenga bebanengi, njalo ezinye ezisuka phandle kwelizwe azisatholakali ngoba khonangale ezithengwa khona sekuvaliwe. Abantu bayabuya sibili bethenga kodwa wonke umuntu ukhuluma ngegcikwane leli esingakwaziyo ukuthi livela ngaphi liyangaphi.”
Bhakhona njalo abathenga bethengisa impahla abawazi mhlophe umkhuhlane lo. UMnu. Michael Ndiweni, umqondisi weBulawayo Vendors and Traders Assocation, uthi abazisebenzayo kumele behlise inani lokuchapha imingcele ngoba kukhuphukisa amathuba okuthola umkhuhlane weCCOVID-19.
“Sesithethe isinqumo sokuthi sixwayise abaphila ngokuzisebenza bethengisa ukuthi behlise inani lokuchapha ama border besiya dinga impahla kumbe bethengisa ngoba kuyakhuphula izinga lokuthi bathole umkhuhlane weCOVID-19 ikakhulu emazweni asiphahlileyo. Lathi sesilawo ama case aseqanjiwe kutsho ukuthi sebezathengisa nzima ngoba bebuthene umkhuhlane lo umemetheka lula.”
Uhulumende weZimbabwe uthi uyazama ukwazisa uzulu ngokumemetheka komkhuhlane weCoronavirus COVID-19 owaqhamuka kwele China ngomnyaka ophelileyo. Kasenelisanga ukuxoxa ngodaba lolu leziphathamandla zikahulumende.
Your browser doesn’t support HTML5
Kulabanye Abantu Abathi Kabazi Lutho Ngomkhuhlane weCoronavirus