Abatsha bathi uhlelo lweZimbabwe Multi-Sectoral Drug Abuse Plan 2024-2030 olusanda kusungulwa nguMongameli Emmerson Mnangagwa lulakho ukuba belwisane kakhulu lohlupho lwezidakamizwa elizweni.
Kodwa kulabanye abathi kaluzose luncede abathatha izidakamizwa njalo labazama ukuzithola emphakathini. :
Abathakazelela okwethulwe nguhulumende kaMnangagwa bathi lokhu kuveza ukuba uhulumende usevumile ukuthi izidakamizwa zithwalise nzima abatsha, ikakhulu abangelamisebenzi. Omunye wabamukele uhlelo lolu nguNkosiphile Dingane, osebenza kunhlanganiso yeYoung People Act.
“Uhlelo olubekwe ngumongameli luzancedisa ukuba udubo lolu luphele ngoba abatsha yibo abaphambanisekayo kulaye wonke umuntu ose Zimbabwe.’’
: UMbalenhle Dube uyakusekela lokhu esithi izidakamizwa zake zamthwalisa amagabha avuzayo.
“Mina njengomuntu owaphunyuka ebubini loba, nxa uhulumende eseyenze lokhu ngibona kuzanceda ukuba sonke sivumelane ukuba izidakamizwa sezikhona elizweni njalo seziyingozi elimaza intsha.”
Kodwa abanye abatsha bathi okukhathazayo yikuba lobanje kwethulwe ugwalo olujulileyo, akucaci ukuba uhulumende uzasungula ihlelo ezitshiyeneyo kumbe hatshi ezokuvikela abasakhulayo ekuthathweni kwezidakamizwa. URegan Tshuma uthi uhulumende kaphumelanga egcekeni ngenhlelo zokusekela uhlelo lweMulti-Sectoral Drug Abuse Plan 2024-2030.
“Nxa bengaze befake ingwalo kumbe amapolicies anjani kungela mali akusisizi lutho. Thina sithi ngabe uhulumende wenza ukuba kube lesikhwama semali eqondane londubo lolu.”
UNkosikazi Nomakholwa Mlilo owenhlangiso yeAnti-Drug Forum laye uthi kumele kubelesikhwama sikahulumende sokulwisana lokuthathwa kwezidakamizwa.
“Ukulwisana lezidakamizwa ulwisana labantu abakhulu abanengisa konke lokhu ukubhenywayo. Awungeke ukenza ukunge loba itiki. Ngabe uhulumende uyabeka isikhwama njalo adinge abantu abafundele umsebenzi lo ukuzwe sinqobe impi le.”
UHebert Mpala isakhamuzi seHarare uthi kumele uhulumende atshengisele ukuba uzimisele ukuvimba ukuthathwa kwezidakamizwa ngokuba lemithetho eqinileyo.
“Umthetho wethu kumele uqiniswe kungancengwa abantu abathengisela abantwana izidakamizwa. Nxa lokhu kungenzakala kungela kuthandabuza sizanqoba.”
URobert Mabhena oweZimbabwe Anti-Drug Network uthi kumele kube lokuqiniswa kwemithetho endaweni lapho okugcinwa khona abantu abayabe besizwa ukuba batshiyane lezidakamizwa.
“Lapho okugcinwa khona abantu kulapho okuludubo khona ngoba kulula ukuba abantu baphunyuke bengakaqeda inhlelo zerehabilitation. Kumele uhulumende ache indawo ezokwenza lokhu ezinengi njalo enze zivikelele.”
t: Isiphathamandla sika hulumende esibona ngodubo lwezidakamizwa kugatsha lwabatsha, uMnu .Norest Chapfika, uthi uhulumende wakhuluma lozulu elungisa ugwalo lwe Multi-Sectoral Drug Abuse Plan 2024-2030 esithi imali izakuba khona ukuze luphele udubo lolu.
“Uhulumende wabeka ugwalo lolu esebone ukuba udubo lolu solwandile. Kungakho imali izakuba khona kodwa okuqakathekileyo yikuba sibambe ndawonye silwe lodubo lolu.”
Akwaziwa ukuba kulabantu abanengi kanganani eZimbabwe abathatha izidakamizwa. Uphenyo olwenziwa yinhlanganiso yeUNICEF ibambisana lohulumende lenhlanganiso ezimbalwa ezizimeleyo lwaveza ukuba abanye abantwana baqala ukuthatha izidakamizwa beleminyaka elitshumi okubangelwa yikuhlupheka, imizi echithekileyo lokunye.
Inengi lithatha imbanje, intshengu lobunye utshwala obungekho emthethweni, umuthi wokukhwehlela, icrack, cocaine, glue, nyaope, heroine, skunk lamaphilisi athengwa okuthengiswa khona imithi ehloliweyo – amapharmacies.