UNkosikazi Thokozani Khuphe usekhethwe ukuba ngumongameli webandla leMDC-T esekelwa nguMnu. Obert Gutu.
Lokhu kwenzakale namhla emhlanganweni weExtraordinary Congress owenzelwe eStanely Square koBulawayo.
Abasemhlanganweni weMDC-T koBulawayo
Umhlangano lo, ongenwe ngabantu abavela endaweni ezitshiyeneyo zelizwe leZimbabwe, ubujonge ukulungisisa ubukhokheli bebandla leli kulandela ukuxabana okwabakhona ebandleni leMDC-T ngemva kokubhubha kukamuyi Morgan Tsvangirai.
Abanye abebekhona ngamalunga amabandla aphikisayo eleMthwakazi Republic Party, lamalunga omanyano wePeople’s Rainbow Coalition ekhokhelwa nguNkosikazi Joice Mujuru kanye lamalungu amanye amazwe avela kwele Bhilithani, eleMelika kanye leIreland lowesifazana obevela eMalawi, uNkosikazi Joyce Kabwila obezoxhasa uMaKhuphe.
Bafake izembatho zebandla leMDC-T okutshengisa uphawu oluguqulwe kancane.
UNkosikazi Khuphe ukhethwe ukuba ngumongameli webandla leli njalo uzasekelwa nguGutu, uMnu. Abednico Bhebhe ukhethwe ukuba ngumgcinisihlalo kwathi uNkosikazi Dorothy Bhebhe wangena esikhundleni somgcinisihlalo wohlangothi lwabesifazana.
UNkosazana Linda Masarira, odume ngokuba lilunga leTajamuka Sesijikile Campaign, ukhethwe ukuba yisikhulumi sebandla leli njalo ukukhethwa kwakhe kudale ukuxabana phakathi kwamalunga ecele leMDC-T likaMaKhupe.
Inengi belikhonona ngokuthi akasilolunga lebandla ngakho akumelanga akhethwe.
Omunye wamalunga ecele leli, uNkosikazi Siphesihle Dube, uthi ujabule ngokhetho lolu kodwa usole ukuthi njengabatsha bakoBulawayo bebevinjelwa ukukhethwa. Uthe bacine bephiwa izikhundla zokuba ngabasekeli.
UNkosazana Linda Masarira laye ukhethwe ukubangomunye wenkokheli yebandla leli.
UNkosikazi Dube ugcizelele esithi umangaliswe ngokukhethwa kuka Linda Masarira othi kathembakali.
UMnu. Samukele Hadebe, okhethwe ukuba ngungumsekeli kanobhala jikele, uthi bekuqakathekile ukuthi kukhethwe inkokheli entsha ezasebenza ilandela isisekelo sebandla labo.
UHadebe uthe umhlangano lo ubizwe yinkokheli eyasalayo ngemva kokuhlubuka kwabanye abagoqela uMnu. Nelson Chamisa othi ungumkhokheli webandla leli okwamanje.
UNkosazana Thokozani Khupe loMnu. Obert Gutu balalele uzulu emhlanganweni weMDC-T.
UMnu. Alfred Ncube, okhethwe ukuba ngumsekeli womqoqi wenhlelo zebandla leli, uthi umhlangano lo wenziwe kahle.
UMnu. Ntando Ndlovu, obona ngezokhetho ebandleni leMDC-T, laye uthi bayajabula ngendlela ukhetho oluqhutshwe ngayo.
Abanye abakhulume emhlanganweni lo yisethekeli uNkosikazi Kabwila oweMalawi kanye lomongameli welinye icele lebandla lePDP, uNkosikazi Lucia Matibenga. Bonke bancome ukhetho lolu kanye lokukhethwa kukamongameli owesifazane besithi sekuyisikhathi sokuthi abesifazana basukume bazimele njalo bathuthukise amazwe abo.
Your browser doesn’t support HTML5
UNkosazana Thokozani Khupe Uthatha Isikhundla Sika Tsvangirai