Ibandla leZanu PF ngoLwesine lenelise ukwethula isicelo sokuba idale lephalamende lihluze udaba lwezijeziso zenotho ezetheswa uhulumende kaMongameli Mugabe leziphathamandla zaleli bandla ngamazwe angentshonalanga.
Inengi lithi lesabela ukuthi ingxabangxoza ekhona ngodaba lwezijeziso zenotho ingacina ibangela ukubhidlika kukahulumende womanyano.
Amazwi omphathintambo obona ngezangaphandle kweleBhilithane uMnumzana David Milliband yiwo asevuse ingxabano phakathi kwamabandla eZanu PF le MDC.
UMilliband uthe ilizwe leBhilithane lilakho ukwesula izijeziso ezafakelwa uMongameli Robert Mugabe labanye bakhe abebandla leZanu PF, kanye lamabhizimisi alobudlelwano lebandla leli nxa inhloko kahulumende uMnumzana Morgan Tsvangirayi engathi amasanctions asuswe.
Ibandla leZanu PF selithe alisoze libe lisaphatheka kunkulumo zokulungisisa okusele kulenga kuhulumende womanyano nxa lezizijeziso zingesulwanga.
Kodwa ele MDC lithi lalo alilamandla okwesula lezizijeziso ezafakwa ngamazwe akumanyano we European Union, eleMelika lamanye.
Ukuhlaziya udaba lwezijeziso lezi sixhume ingcwethi ezicubungula ezombusazwe uMnumzana Walter Nsununguli Mbongolwane loMnumzana Paul Siwela olilunga lebandla leZAPU. USiwela uqala ngokuchasisa ukuthi zikhona ezinye izijeziso eseziphazamise ingqubela phambili kwezenotho.