Kugcwele amasotsha esigodlweni seMelika eWashington DC ngesikhathi kulungiselelwa ukugcotswa kuka Mnu. Joseph Biden, owanqoba uMongameli Donald Trump, kukhetho lukamongameli olwenziwe ngoLwezi nyakenye.
Ababona ngezokulondolozwa kwemithetho bathi abalandeli baka Trump abahlomileyo balakho ukuhlasela iCongress ngosuku kugcotshwa uBiden.
Kugcwele ibutho leNational Guard phandle kwedale leCongress, emawofisini amanengi kahulumende, endaweni eziqakathekileyo njalo kufakwe ucingo oluphose luvale ngci isakhiwo seCapitol, esahlaselwa mhlaka 6 Zibandlela ngabalandeli baka Trump ababesithi kumele kumiswe ukuhlolisiswa kwama electoral votes.
Bamelele ozazama ukuhlasela eCapitol Hill.
Abantu laba bangena ngenkani kuleyo ndawo lapho ababesithi bafuna ukuthwalisa nzima amalunga edale leHouse of Representatives lawe Senate, ikakhulu akubandla lama Democrats lalabo abangasekeli uTrump, olokhu esithi ukhetho lwebiwa nguBiden labanye bakhe. Akulabufakazi obuveza ukuba ukhetho kalwenziwanga ngemfanelo.
Ibutho ligcine njalo iWhite House, iNational Monument lezinye izakhiwo ezabelweni ezinengi, okuthiwa zingahlaselwa ngabalandeli baka Trump abangafuni ukuba uBiden angene esikhundleni sikamongameli.
Ukugcwala kwebutho kwenza engani sokulempi yomvukela kwele Melika. Amapholisa ensitha aweFederal Bureau of Investigations kumbe iFBI, adinga ngamehlo abomvu abalakho ukwenza udlakela lalabo abangena ngenkani eCongress.
Balondoloza iCapitol Hill
UMnu. Okay Ndlovu, olandela ezombusazwe, uthi kuyasinda okwenzekala eMelika.
Uthi abantu abanengi kade bephephela kwele Melika isikhathi sonke.
Osekela uTrump, uMnu. Sikhumbuzo Mlalazi, uthi abantu bakwele Melika sokumele babhekane lokwenzakala elizweni leli hatshi kuzwekazi leAfrica.
UMnu. Joseph Tshuma, owebandla leZanu PF, uyakusola kakhulu okwenziwa nguTrump.
Washington, Capitol Hill, uMnu. Joe Biden loMongameli Donald Trump.
Loba kuxokozela eMelika, uBiden ukhangelelwe ukuba uzagcotshwa ngoLwesithathu kulabantu abalutshwana kakhulu phandle kwedale leCongress ngenxa yomkhuhlane weCOVID-19 kanye lesimo esibi sezomvikela.
Umsekeli wakhe, uNkosikazi Kamala Harris, kukhangelelwe ukuba uzafungiswa nguJustice Sonia Sotomayor. UBiden uzahanjiswa eWhite House lapho uTrump akhangelelwe ukuba uzasuka ekuseni elubhekise emzini wakhe eFlorida.
Kasoze ahambe emcimbini wokugcoba uBiden. Umsekeli wakhe, uMnu. Mike Pence, uthi uzakuyabona uBiden loNkosikazi Harris begcotshwa.
Your browser doesn’t support HTML5
Amasotsha Ahlome Aphelela Aselondoloza Izakhiwo Ezingahlaselwa Ngabalandeli Baka Trump