Inhlanganiso ezimele osomabhizimusi lamankampani amakhulu emazweni asebenzela kwele Zimbabwe zithi manengi amankampani asefuna ukwabela izisebenzi amashares ukwenzela ukuthi alandele umthetho wohlelo lwe indigenization.
Abamele iZimbabwe National Chamber of Commerce, iConfederation of Zimbabwe Industries kanye le Matabeleland Chamber of Industries bathi kusobala ukuthi amankampani amanengi asesungula inhlelo ezizakwenza ukuthi aphakulele izisebenzi amashares ayisilinganiso sokungamatshumi amahlanu lanye ekhulwini-51%.
Lokhu yikho okumele kwenziwe ngaphansi komthetho weIndigenization osolwa nguzulu esithi ubunjwe libandla le ZANU PF elidinga ukuvotelwa.
Umnu. Trust Chikohora owake waba ngumqondisi we Zimbabwe National Chamber of Commerce uthi amankampani afuna ukwabela izisebenzi amashares ayenza okufunwa nguzulu.
Umnu. Isaac Mabuka ongumqondisi we Chamber of Commerce kwele Mandebeleni uthi manengi amankampani emazweni azakwabela amashares izisebenzi kuhlelo lwe indigenization.
Kusenjalo, iphephandaba le Zimbabwe Independent libika ukuba inkampani ye Rio Zimbabwe Limited ilakho ukuthathwa ngamabhanga alabaqondisi be Zimbabwe afuna ukubhadalwa izikwelede ezathathwa yinkampani le ezifika phose izigidi ezingamatshumi amathathu zamadollar eMelika.
Amabhanga la abikwa efuna ukuthi izikwelede lezi ziguqulwe zibe ngamashares okuzakwenza ukuthi abe lamashares ku Rio Zimbabwe ayisilinganiso sokungamatshumi amahlanu lanye ekhulwini.
Amabhanga la agoqela iKingdom Ffinancial Holdings, iZimbabwe Banking Corporation, Premier Bank, Trust Banking Corporation kanye le Metropolitan Bank ase zandleni zabansundu. Ssenelisanga ukukhuluma labaqondisi be RioZim.
