Ugatsha lukahulumende olubona ngokulondolozwa kwezemvelo lenyamazana zendle olweZimbabwe Parks and Wildlife Management Authority (ZIMPARKS) luthi kufe indlovu ezingamatshumi phose amane, 39, kunyanga ezimbili ezedluleyo ngenxa yendlala.
Isikhulumeli seZIMPARKS uMnu Tinashe Farawo utshele iStudio 7 ukuthi isimo sibi kakhulu endaweni okugcinelwa khona inyamazana zasendle, ikakhulu eHwange National Park ngoba akuselamadlelo lamanzi.
“Sesifelwe zindlovu ezingu 39, ikakhulu eHwange National Park. Ezingu 12 zifele duzane le Main Camp, uphenyo lwethu lusivezela ukuba lezi zibulewe yindlala nje, ngesizatho sokuba impondo sizifice zikhona,” kutsho uFarawo.
“Sisaphenya ezinye, kodwa impawu zitshengisela ukuba zikhona ezinye njalo ezafayo zangabonakali., lokhu kusazoqhubeka mpaka izulu lize line.”
Lanxa kungakazakali ukuthi sokufe indlovu ezingaki eZimbabwe yonke jikelele ngendlala kusukela ekuqaleni komnyaka, indlala yanyakenye ibulale ezilitshulu elilamatshumi ayisithupha, 160, eHwange National Park.
Inhlanganiso ezimeleyo eziphatheke kumsebenzi wokulondoloza ezemvezo ithi inani leli lingedlula elibikwa yi ZIMPARKS.
Isiphathamandla salinhlanganiso uMnu Daniel Sithole uthi benze uphenyo oluveze amanani aphezulu.
“Ngocwaningo lwethu esesilwenzile, kulendlovu ezingafika amatshumi amane lanhlanu, kulendlovu ezifileyo kunyangedlule kuphela, zibulawa yikuswela amanzi.”kuveza uSithole.
Ngaphandle kwendlovu, indlala isibulele izifuyo ezinengi lezinye inyamazana zasendle. Indlovu ikakhulu, seziphuma kuma-game parks zisiyadinga amanzi ebantwini lapho ezicina zibalimaza kumbe ukubabulala.
Izakhamizi zeDete leHwange, njengakwezinye izigaba ezingcelelane lendawo zenyamazana zasendle, zikhala ngalezinyamazana. Izolo lokhu eHwange abeZIMPARKS badubule indlovu ebihlupha izakhamizi.
Umkhokheli wenhlanganiso emela abahlali beHwange eyeGreater Whange Residents Trust uMnu Fidelis Chima uthi ukungangabiyelwa kweHwange National Park, ukuswelakala kwemigodi yamanzi enyamazana kanye lamankampani amaChina emba amalahle duzane lalindawo yikho okubangela ukuthi inyamazana zingene ebantwini.
“Kodwa lokhu akubaphimvumo yokudubula indlovu,” uChima ubeka umbono wakhe.
“iyakwazi ukuthi akulamanzi e Hwange National Park, akulakudla njalo ama mines yiwo enza indlovu zibuye emizini yabantu.”
Uhulumende wazise ngenyanya edluleyo ukuthi uzabulala indlovu ezingamakhulu amabili, 200, ukuze aphe abantu abahlaselwe yindlala inyama basizakale, esithi le yindlela njalo yokwehlisa inani lendlovu elizweni, lona athi selifike kunkulungwane ezingamakhulu ayisithiyangalolunye, 80,000.
Kodwa inhlanganiso yeCentre for Natural Resources Governance iyakusola lokhu, njalo isilobele idale lePhalamende isithi kumele likuvimbe.
SEE ALSO:
Udaba Esilwethulelwe NguNokuthaba Dlamini