Amapholisa eZimbabwe ayaphika ukuthi adubule abantu akade betshengisela ezitaladini edolobheni leHarare ngoMgqibelo bengaphansi kwenhlanganiso efuna kuguqulwe indlela okuqhutshwa ngayo ukhetho elizweni eye National Electoral Reform Agenda (NERA).
Amabandla akunhlanganiso le agoqela eleMovement for Democratic Change ekhokhelwa nguMnu. Morgan Tsvangirai, iZimbabwe People First ekaNkosikazi Joice Mujuru lamanye ambalwa, athi akade betshengisela badutshulwe emalokitshini anjenge Kuwadzana, Dzivarasekwa, Mufakose, Epworth leKambuzuma.
UMnu. Douglas Mwonzora, isikhulumeli seNERA, uthe labo abacatshangelwa ukuthi badubule abatshengiselayo kade besebenzisa imota yamapholisa.
UMwonzora uthe kulabantu ababili abalimeleyo okutshengisela ukuthi badutshulwe njalo abangamatshumi amabili balaliswe ezibhedlela ezitshiyeneyo. Uthe lokhu kugoqela amalunga eMDC akudale lephalamende.
Kubotshwe abantu abanengi eHarare, Kadoma, Gweru, Chinhoyi, Gweru, Gutu, Mutare, Gwanda lakwezinye indawo zelizwe lapho abantu akade betshengisela ezitaladini besekela okufunwa yiNERA.
Isikhulumeli samapholisa, uPaul Nyathi, utshele iVoice of America ukuthi kabazange badubule abantu akade betshengisela ngoMgqibelo.
“Lawo ngamanga … Asizange sidubule muntu … Lowo okhuluma njalo kumele aphumele egcekeni asitshengise ubufakazi bakhona bokuthi abantu badutshulwe ngamapholisa.”
Ukutshengisela lokhu kuqale ngoNtulikazi uzulu ekhonona ngesimo esibi somnotho welizwe lokunye okukhathaza abantu makhaza.