Abohlangothi olubona ngezomnotho ebandleni le MDC-T bathi kweleZimbabwe kudingala imali enengi ukuze kuvuselelwe umnotho osule minyaka ukhasa ngamadolo.
Unobhala kwezemali kulelibandla umnumzana Webber Chinyadza utsho lokhu emhlanganaweni lentathelizindaba, owenzelwe emahofisini abo awe Harvest House ngoLwesihlanu ekuseni.
Lesi simo kwezombusazwe, sibikwa sesibangele ukwesaba kwabosomabhizimusi abafisa ukuzasungula amabhizimusi eZimbabwe bethikaziswa yimithetho ebalisa olupha abansundu, amandla kumankampani owe Indiginisation.
Ezokulima, iMDC-T ithi sezibuyele muva lanxa abensundu sebeyibo banini mapulazi, kungela misebenzi yokulima yesibanga saphezulu eqhutshwayo osokubangele ukusilela kokudla elizweni lalapho izulu line kakuhle.
Kunje ilizwe lidinga amabillion phose amabili amadollar-$1,7 billion ukuqhuba umsebenzi wokulima lonyaka kodwa kungela landlela yokuthi limali ingatholakala ngaphi njalo njani.
Ukulima ngokuthelezelwa iMDC-t ithi yiyo kuphela indlela okumele ilandelwe, nanku phela ngale iminyaka izulu lingasani kuhle njalo lenguquko kwezomkhathi isiphazamisa ukuna kwalo.
Imali edlula kancane isigidi lengxenye-$1,6million eyabelwe loluhlangothi lwezokulima ngokuthelezela ingeneli njalo lingekho ithemba lokuba izaphuma yonke loba hatshi.
Umnumzana Jeffius Moyo isakhamuzi seHarare uthi lesi simo siyadanisa okwamagama.
UMoyo uthi sekungumsebenzi kazulu weZimbabwe ukuletha inguquko kwezenotho, hatshi ukugoqa izandla nje.
Umnotho weZimbabwe ugxile kakhulu kwezokulima ngoba yilo uhlangothi oluphakamisa ezokulungiswa kwempahla elizweni kodwa ingcwethi zenotho zithi uhulumende weZanu PF akaluqakathekisi, ngoba inlutshwana imali ayihlelela lumsebenzi.
Zithi lezi ngcwethi le yinto edanisayo ngoba ukulukhangelela phansi loluhlangothi kuyingozi, ngalesi sikhathi kulohlupho lokuguquka komkhathi emhlabeni jikelele lezulu lingasani njengalokho elalikwenza eminyakeni edlule.