Ontanga abavela emabandleni ehlukeneyo ezombusazwe kanye lenhlanganiso ezizimeleyo, phansi komanyano we National Youth Action Alliance, bayavumelana ukuba ukutshengisela yiyo kuphela indlela engasetshenziswa ukuletha inkululeko uqobo eZimbabwe. Bathi bafuna umongameli Robert Mugabe lenkokheli yakhe bavume ukuba sebehlulekile, basuke embusweni ngoba uzulu sediniwe ngesimo esikhona elizweni.
Lokhu ngokunye kokuphume emhlanganweni lentathelizindaba owenzelwe e Media Centre ngoLwesibili ekuseni lapho inkokheli yomanyano we National Youth Action Alliance, yethule umbiko ophezu kwemikhankaso yokubonisa uhulumende we Zanu Pf okhokhelwa ngumongameli Robert Mugabe ukuthi sokuyisikhathi sokusuka embusweni.
Umgcinisihlalo we NYAA enguye njalo okhokhela inhlanganiso yezifundi zemaUniversity kanye lamakolitshi elizweni, ye Zimbabwe National Students Union – ZINASU, umnumzana Gilbert Mutubuki, utshele intathelizindaba ukuba le yiyo indlela kuphela, engabamba ngamandla uhulumende okhona ukuthi alalele izikhalazo zikazulu.
Lokhu kugcizelelwe ngokhokhela iqula labaqhuba umkhankaso wokutshengisela ukuthi kususwe uhulumende okhona owe Occupy Africa Unity Square Movement umnumzana Itai Dzamare okhuthaza ontanga ukuba babe yibo abawukhokhelayo lumkhankaso ngoba kuyibo abali neni elikhulu elizweni njalo beyibo ababhekane lenkinga ezimbalwa okubalisa ukuswelakala kwemisebenzi, ukuphazamiseka kwemfundo ezigabeni zonke zelizwe.
Bebekhona abaze ukuzasekela lumkhankaso njalo abanye babo kungamalunga avelele emabandleni ehlukeneyo okufana lele ZAPU elikhokhekhelwa ngumnumzana Dumiso Dabengwa, abanje ngesikhulumeli salelibandla umnumzana Mjobhiza Nuku oveze ukuwusekela umbono walumanyano wabontanga ethi beluvele seluphuzile.
Waqhubeka uNuku ethi ibandla lakhe lisekela leli nyathelo lokutshengisela ngoba lilakho ukuguqula isimo elizweni kuthuthukiswe lenhlalakahle kazulu.
Uphikisana lombono othi uzulu we Zimbabwe uligwala, njengokutsho komkhokheli welinye lamacele eMDC ele Renewal, umnumnzana Tendai Biti kunsukwana ezisanda kwedlula, othe uzulu kenelisi ukusebenzisa amandla akhe ukuguqula isimo elizweni okuyinto esiyenze inkokheli yebandla le Zanu PF yenze santando engekho olesibindi zokuyikhuza.
Umnumzana Stephen Sibanda ngosakhulayo ovelele ebandleni eliphiksayo le Mavambo/Kusile/Dawn, elikhokhelwa ngu Dr Simba Makoni, okungelinye lamabandla ezombusazwe akumanyano we NYAA. Uthi uSibanda lumanyano uzasebenza ngendlela eyahluke kweminye eke yabunjwa, ngoba ingelani lobunengi balabo abazaphatheka kiwo, ethi isiqokoqela kuyikuba iyafezeka injongo yawo.
Wengeza ethi injongo yabo kungasi kudinga imali njengalokho okuhlezi kukhulunywa ngabanengi sikhathi sonke nxa kusenziwa imizamo enje.
Ubunjwe ngomgqibelo odluleyo, mhla ziyisikhombisa kuyonale inyanga ka Nhlolanja - 7 February 2015, lumanyano weNYAA. Zilitshumi lanhlanu okwamanje esengamalunga alomanyano selokhe wabunjwayo.
Lezi ngezibalisa enye yenhlanganiso yezifundi zema university lemakolitshini ye Zimbabwe National University Students Union – Zinasu, elwela ilungelo lezakhamizi ze Harare ye Harare Residents Trust – HRT, ekhankasela ukusuka kukamongameli Robert Mugabe lebandla alikhokhelayo leZanu Pf ebukhosini ye Occupy Africa Square Movement – OAUS kanye lelwela ilungelo lalabo abasebenza lapho kwenjiwa khona amandla aligugu ye Mining Communities Coalition.
Enye njalo yenhlanganiso ezilwela ilungelo lezakhamizi ze Harare ye Harare Residence Alliance - HARA, eye Progressive Democrats of Zimbabwe – PDZ, elinye lamacele ebandla eliphikisayo le Movement For Democratic Change elikhokhelwa ngumnumzana Morgan Tsvangirayi, ibandla lezombusazwe njalo elalikhokhelwa ngumuyi u Bishop Abel Muzorewa le African National Council – ANC kanye lelikhokhelwa ngu Makoni le Mavambo/Kusile/Dawn.
Icele le Movement fo Democratic Change elikhokhelwa ngu Proffessor Welshman Ncube ,ele Gungo-Bond, inhlanganiso ye Democratic Assembly for Restoration and Empowerment kanye lebandla eliphikisayo, eselavuselelwayo le Zimbabwe African People’s Union – ZAPU elikhokhelwa ngumnumzana Dumiso Dabengwa kungamanye amalunga alomanyano.