Bekulombuthano wabaphekela izethekeli eVictoria Falls ngoLwesihlanu abazinkulungwane ezilitshumi – 10,000 ababukise ukudla okutshiyeneyo okuthakazelelwa yizethekeli.
Akade bethe gwaqa edolobheni leli kumbuthano lo wokupheka ezifela emlonyeni lokunye oweUnited Nations Tourism Regional Forum badabuka kwele Angola, Malawi, Ghana, Botswana, Nigeria kanye lengcitshi zebhodo zakuleli lapho ezithethe imzuzwana zincinda okuphekwa ngalizwe ngalizwe.
UMnumzana Zurab Pololikashvili, unobhala jikelele weUnited Nations World Tourism Organization, utshele abakumbuthano lo ukuba kulusizi indlela ukudla kwezwekazi leAfrica okungazakali ngakho, ethi yikho okwabayisisusa sokusungulwa kwaloluhlelo lweGastronomy.
“Abangane bethu kwanye amazwe abazi lutho ngokudla kwezwekazi leli. Kimi, lokhu yikuqala kohambo oluhle njalo sizizwa siziqhenya ngalo. Siyabona intsha iphatheka, ngalokhu sibavulela amathuba emsebenzini ezabaphilisa kanye lemuli zabo.”
UMongameli Emmerson Mnangagwa laye ubesendaweni le lomkakhe uNkosikazi Auxilia Mnangagwa. UMnangagwa uvule okusemthethweni umbuthano lo.
“Sikulinjongo yokubukisa ezokudla kwezwekazi lethi, izwekazi lezi kufuze lenelise ukuziphandela okukudla ngezemvelo lazo. Asiziqhenyeni ngemvelo yethu ngoba ijiyile ekusakheni imzimba kanye lokwelapha imikhuhlane ehlukeneyo.”
Umkakhe laye uphose awakhe amazwe ngezokupheka.
“Amazwe amanengi kubalela ele China, Spain, Japan lamanye aqxile kakhulu elibukiseni ukudla kwesintu sakibo, lokhu sekwenze imnotho yakhula. Ngalokhu, yiyo kanye lathi injongo esilayo ngezwekazi leAfriva ukuze sazakale. Lokhu kuyasiphathisa njalo ukulondoloza amasiko lemvelo yethu ngapho sithuthukisa ilizwe lethu.”
Osebenza endaweni ezithakazelelwa yizethekeli, uMnu. Siphambaniso Moyo, uthi abantu abavela kwamanye amazwe bayakuthanda ukudla okutshiyeneyo kweZimbabwe.Uthi lumbukiso ulethemba lokuba abaphekayo bazafunda lokhu lakhuyana.
Emaphethelweni okugqitshwa kumbuthano weUnited Nations Tourism Regional Forum namuhla, uPololilashvili ubike ukuba sebezavula isikolo seTourism and Culinary Arts Academy e Victoria Falls lapho intsha ezafundela khona ukupheka ukudla komdabu.
Phezu kwalokhu, babike ukuba bazaqeqeatshisa mahala abafundi abangamakhulu amabili bakuleli. Lokhu kugqitshwe ngokulobelana phansi izivumelwano zalokhu.
Endlini zokuphekela, ababukisayo bebegaye amanamunende eziwa ngezithelo zesintu, umgqutshu, umfuswa, isithwala kanye lokunye okudliwa yimhlobo ehlukeneyo.
SEE ALSO:
Udaba Esilwethulelwe NguNokuthaba Dlamini