Kulenkampani yakweleChina esebenzela eZimbabwe ehlawuliswe ifayindi yamadola eMelika angamakhulu ayisikhombisa, iUS$700, ngumthethwandaba ngemva kokwetheswa icala lokusebenzisa amagagasi obulembu be-internet, awenkampani yeStarlink, yona elokhe imelele ukuphiwa ilayisensi nguhulumende.
Abatshutshisi bathi iziphathamandla zeSan He Mining Company, eseBindura, zephule umthetho wePostal and Telecommunications Act.
I-Starlink yinkampani yesizwalwane sakweleMelika uMnu Elon Mask, exhumanisa abantu nge-internet isebenzisa ubungcitshi be-satellite.
Linkampani seyafaka isicelo sokuthi ivunyelwe ukusebenza okusemthethweni eZimbabwe kodwa uhulumende ukhanya ethatha isikhathi sakhe.
I-Starlink seyaphiwa imvumo yokusebenza emazweni angomakhelwane afana leMozambique, Malawi leZambia lapho izizalwane zaseZimbabwe ezibikwa zithenga khona ama-dish lama-router okubamba amagagasi.
Bakhona njalo abawathengisayo ngaphandle komthetho eZimbabwe.
Lanxa inkampani yaseChina le ibotshelwe ukusebenzisa i-internet yeStarlink, icala elilotshwe ngabatshutshisi ngelokuthi itholakale ilomsakazo we-radio ongela layisensi, okuyinto igqwetha uMnu Nqobani Sithole athi iyadida.
Your browser doesn’t support HTML5
Ingxoxo loMnu Nqobani Sithole