Ibandla le MDC-T lisole kakhulu ukubotshwa kukameya wedolobho le Gweru, uMnu. Mamutendi Kombayi lonobhala kamanisipala, uMnu. Nathaniel Matau, besetheswa icala lokusebenzisa ihofisi okungengekho emthethweni.
Ababili laba babotshwe ngoLwesine njalo bebelokhu besesitokisini se Gweru Central ngoLwesihlanu kusihlwa.
Ibandla leMDC-T lethule umbiko lisithi kumele ababili laba bakhululwe ngokuphangisa. Lisithi njalo ibandla leli, isehlakalo lesi sitshengisa ukungananzwa kwelungelo loluntu.
UKombayi lekhansili yonke basanda buyiselwa emsebenzini ngumthethwandaba ngemva kokumiswa umsebenzi nguhulumende besetheswa amacala okungethembeki umthethwandaba awalahlela khatshana.
Igqwetha lababili ababotshiweyo, uMnu. Brian Dube utshele i Studio Seven ukuthi amapholisa kawaluphathi kahle udaba lokubotshwa kwababaili laba njalo bakhangelele ukuthi bazasiwa emthethwandaba ngoMgqibelo.
"Okwenzakalayo okwamanje yimizamo nje yokufuna ukuyangisa uMayor, ungathi umuntu esanda kubuyiselwa emsebenzini ngemva kokukwetheswa icala lamanga elilahlwe ngumthethwandaba uphinde umvalele ngelinye icala?" kutsho uDube.
Your browser doesn’t support HTML5
Udaba lokubotshwa kukaMayor weGweru