Amapholisa eHarare ngoLwesine abophe intathelizindaba ezimbili ezephephandaba le Newsday, uNqaba Matshazi loXolisani Ncube besetheswa icala lokuloba udaba olungamanga.
Amapholisa athi udaba lokuthi amapholisa ensitha, ama CIO athole iholo lebonus ngensitha lungamanga. Leliphephandaba lathi ama CIO athola iholo mhlaka 21 ngoMpalakazi kwathi ngemva kwamalanga amatshumi athola ibonus.
Igqwetha lentathelizindaba lezi, uMnu. Taona Nyamakura utshele iStudio Seven ukuthi sikhuluma nje, zivalelwe estokisini se Harare Central njalo zikhangelelwe ukumiswa phambi komthethwandaba ngoLwesihlanu.
Unobhala jikelele wenhlanganiso elwela ilungelo lentathelizindaba eye Zimbabwe Union Of Journalists, uMnu. Foster Dongozi, uthi bakhathazekile kakhulu ngaloludaba ngoba nxa umuntu engavumelani lalokho okulotshwe yintathelizindaba kumele asebenzise ezinye indlela hatshi ukuzihlukuluza loba ukuzibopha njengalokho okwenzakeleyo.
"Thina njengenhlanganiso elwela ilungelo lentathelizindaba siyasola kakhulu ngamagama aqinileyo ukubotshwa kumbe ukuhlukuluzwa kwentathelizindaba kumbe abantu abasebenzela inhlanganiso ezibona ngokuqutshwa kwembiko," kutsho uDongozi.
Uthe lokhu akutshengisi kuhle isimo selizwe le Zimbabwe ngoba behlala bengabakhuluma ukuthi abasola indlela elotshiweyo kumele bayekhala kunhlanganiso ye Voluntary Media Council ku Media Commission kumbe baye emthethwandaba kuhlangothi lwamacala athiwa yi Civil ngesilungu.
Your browser doesn’t support HTML5
Ingxoxo loMnu. Foster Dongozi