Amapholisa akoBulawayo ngoLwesithathu abophe intatheli yephephandaba leStandard uNqobani Ndlovu emethesa icala lokubhala udaba lwamanga oluphume kuphephandaba leli ngeSonto.
UNdlovu ubotshwe ekuseni wavalelwa enkambeni yeCentral Police Station. Udaba alufelayo belusithi ongqongqotshe bamapholisa sebebize abalwa impi yenkululeko labake baba ngamapholisa ukuba bazethatha izikhundla esipholiseni.
Belusithi njalo imihloliso ebimele ilotshwe ngenyanga ezayo ngamapholisa adinga ukukhuphuka enikwa izikhundla eziphezulu ayisoze ib’saqhutshwa ngoba izikhundla lezo zizathathwa ngababiziweyo laba.
Amapholisa athi limbiko ingamanga lanxa nje engazange ayilandule lapho ekhulumisana loNdlovu ngesikhathi ebhala udaba lwakhe.
NgoLwesibili khona amapholisa la athethe umhleli weNews Day leStandard koBulawayo uMnu Dumisani Sibanda ambuzisisa ngodaba lolu efuna ukwazi ukuba uNdlovu ubejongeni ngokululoba.
Amekelile ngemva kokumbuzisisa, azobopha-ke uNdlovu ekuseni ngoLwesithathu.
Igqwetha lakhe uMnu Josphat Tshuma utshele iStudio 7 ukuba ukhangelele ukuthi uNqobani asiwe emthethwandaba ngoLwesine lapho athi uzaliphika icala abhekane lalo.
Kunjalonje, umqondisi wenhlanganiso elwela ukulondolozwa kwamalungelo entatheli iMisa-Zimbabwe, uNhlanhla Ngwenya usole amapholisa ngokubopha uNdlovu esithi lokhu kuveza ukuthi ukuhlukunyezwa kwentatheli kuqhubekela phambili elizweni.