Abasakhulayo beMDC-T abangamatshumi amabili lanhlanu babotshiweyo eHarare ngoLwesine bephakathi kokutshengisela besola umbuso weZanu PF.
Bebesola njalo uMongameli Mugabe besithi seyehlulekile ukubusa; ngalokho sokumele asuke esihlalweni.
Ontanga laba bebekhonona njalo ngokuhlukuluzwa kwamalunga ebandla labo ngamapholisa labasekeli beZanu PF.
Abanye bababotshiweyo babikwa betshaywe ngamapholisa. Kubotshwe njalo intathelizindaba kamabonakude esebenza izimele uAndrison Manyere.
Asenelisanga ukuzwa ukuthi abasolwa laba bazamiswa nini emthethwandaba.
Ukhansila weMDC-T koBulawayo njalo engosakhulayo uMnu Mlandu Ncube usole kakhulu amapholisa ngokuhlukuluza amalunga ebandla lakhe.
"Kuyadanisa ukuthi eZimbabwe silesisekelo sombuso esivumela abantu ukukhuluma abakufunayo kodwa siyabotshwa njalo sihlukuluzwa," kukhonone uNcube.
Ukubotshwa kwabasekeli balelibandla lokhu kulandela ukubotshwa kwamanye njalo amalunga eMDC-T alitshumi lasikhombisa eHarare ngeSonto.
Akhululwe lawa malunga ngumthethwandaba kamantshi ngoLwesithathu.
Your browser doesn’t support HTML5
Ingxoxo loMnu. Isaac Mpofu