Amapholisa kweleBotswana athi kubotshwe abantu abaphose bafike ikhulu, besetheswa umlandu wokuzama ukungena elizweni besebenzisa amaphepha empumela yokuhlolwa iCovid-19 awokuzikhandela.
Isikhulumi samapholisa akwele Botswana, umnunzana Near Bagali uthi abantu abangamatshumi ayisikhombisa lanye (71) babotshwe emngceleni etshiyeneyo bezama ukungena elizweni bephethe amaphepha awokuzikhandela awe PCR test. Lokhu kugoqela abalitshumi lanhlanu (15) abokuza kuthi abanye ngabeBotswana.
UBagali uthi ababanjiweyo laba, bahlawuliswe imali engadluli amaPula ayinkulungwane ezinthanthu (P3,000) kukanti abanye bamiswe phambi komthethwandaba bagwetshwa kodwa baphiwa izigwebo ezingabenzi bapike, kuqoqonselwe ukuthi bengaphindi futhi bedale icala elifanayo.
Ukubotshwa kwabantu abalamaphepha okuzibazela kuza ngesikhathi inengi likhala ngokuthi intengo yokuhlolwa iCovid-19, iPCR test, iphezulu kakhulu.
Indawo zempilakahle kweleBotswana zihlawulisa amadola eMelika aphakathi kwangamatshumi ayisithupha ($60) kusiya kwangamatshumi atshiyagalombili ($80).
Lokhu kutshiye abanye abeZimbabwe besehluleka ukuyafika ekhaya ngesikhathi sekhefu lekhisimusi.
Umnunzana Mthabisi Dube, yena okade ekweleSouth Africa ngekhefu, uthi noma nje kungaqondanga ukuthi abantu besebenzise amaphepha aweCovid-19 okuzibazela, intengo yokuhlolwa kumele iyehlisiwe.
“Udaba lolu sesikhale ngalo kanengi. Sithi ngabe kuyakhangelisiswa intengo zakhona ukuze kube lalokhu esithi yistandardised rate yokuhlolwa, ukwenzela ukuthi ukuhamba phakathi kwamazwe kubelula ngesikhathi seCovid-19.”
Ngokunjalo, umnunzana Rodwell Moyo, yena ongena kanengi kweleBotswana ezothengisa imphahla yakhe, uthi ngaphandle kwendleko zemali, ukuhlolwa kanengi kubuhlungu.
“Imali zakhona zinengi kakhulu. Uhlolwa eZimbawe uphinde uhlolwe kweleBotswana. Yinto ebuhlungu engamnandi.”
UMoyo uqhubeke esithi kumele kube ludaba oluhlafunwa yinkonkheli yamazwe atshiyeneyo ukuze kubonwe ukuthi akulandlela okungehliswa ngayo inhlawulo yokuhlolwa.
“Kumele ohulumende balukhangelisise loludaba. Imali zakhona zisuka zibe nengi kakhulu. Njengoba abantu sebahlatshwa yindaba kungenziwa kubelula, kungahlolwa njalo nje.”
EleBotswana yilolodwa emhlubulweni wangezansi kwezwekazi leAfrica elilentengo ephezulu yokuhlola iCovid-19 kusetshenziswa iPCR test.
EleSouth Africa, kulandela umfutho owafakwa ngabe Council of Medical Schemes, bayehlisa intengo yokuhlolwa iCovid-19 isuka kuma Rand angamakhulu ayitshiyagalo mbili lengxenye (R850), kusiya kumakhulu amahlanu (R500). EZimbabwe indawo ezinengi zihlawulisa phakathi kwamatshumi amabili amadola eMelika (US$20) kusiya kumatshumi amathathu (US$30).
Kusenjalo, umongameli Mokgweetsi Masisi wakweleBotswana usungule umsebenzi ngoLwesibili ngemva kokuhlala amalanga alitshumi ezivalele emzini wakhe, kulandela ukutholakala kwakhe eleCovid-19.
UMasisi ukhuthe ukungena umhlangano we SADC wona owenzelwe eMalawi ukuhlaziya isimo saseMozambique ngenxa yesimo sakhe.
Umsekeli kaMasisi, umnunzana Slumber Tsogwane, nguye omele iBotswana emhlanganweni lo oqhutshwe ngoLwesibili langoLwesithathu.
Your browser doesn’t support HTML5
Udaba lokubotshwa kwabafunyenwe belamaPCR Tests okuzibazela siluphiwa nguMqondisi Dube