Umkhokheli webandla elingaziwayo ele People’s Front, uMnu. Owen Kuchata labasekeli bebandla lakhe abangamasotsha abathi Borman Ngwenya lo Solomon Makumbe kunye lo Silas Pfupa bebesemthethwandaba izolo.
Iphephandaba le The Herald lithi abane laba babanjwa ngoLwesihlanu olwedluleyo belamabhomba epetulo ababefuna ukubhomba ngawo imitshina yochago epulazini le Gushungo dairies elemuli kamongameli Mugabe eMazoe.
Leliphendaba lithi abane laba babanjwe belamagwaliba ebandle leli elingaziwayo.
Ukuhlaziya loludaba sixoxe lengcwethi ecubungula ezombusazwe, umnu. Brilliant mhlanga othi le ngenye njalo indaba engelaqiniso.
“Ngibona angani asonto enkulu efanele ukuthi yethuse abantu. Okokuqala yikuthi vele sesikwazi ukuthi eZimbabwe abantu bayaphekelwa amacala bazithole sebesesimeni esifana laleso. Okwesibili yikuthi vele eqinisweni umumo okhona eZimbabwe yikuthi iZanu PF isehlulekile ukuthi inga addressa njani ama problems esihlangana lawo,” kutsho uMhlanga.
Uthi lokhu ibandla leZanu PF ikwenzela ukuthi idonsele eceleni uzulu eqale ukukhangela indaba ezinje itshiyana lomumo okhona elizweni.
Lokhu okwenzakalayo sekuke kwenzakala eminyakeni edluleyo kubotshwa abantu besetheswa amacala afana lokufuna ukubulala umongameli lokunye okunjalo.
Umhlanga uthi: “Bangaba belabantu abalebandla labo. Ibandla elincane vele elinelancedo, ibandla ebelingaziwa. Kodwa iZanu iyathanda ukuthi amabandla anjengalonaleli iwancedisa ukuthi ngokuwabopha khonoku akhukhumale aze aziwe.”
Uthi lokhu kungaba kusenzelwa ukuthi abantu bakhohle ngokwenziwa ngamanye amabandla afana labo eMDC.