Umdeni wako Kgwatalala uthakazelela ukuvuselelwa kobuduna babo eMawaza esabalweni seMatabeleland South.
Bekugcwele abantu emzini wakoKgwatalala ngoLwesine lapho uzulu abezobona induna entsha igcotshwa.
UMnu. Royal Nare, oleminyaka yokuzalwa engamatshumi ayisithupha lasithupha nguye oseyinduna uKgwatalala. Abelunga besula ubukhosi buka Kgwatalala ngomnyaka ka1951 kwasala kubusa induna uMathe. UMnu. Marshal Dube, umzukulu wesikhosini, uthi besesiside isikhathi belindele lolusuku.
“Sifeze okwaqalwa ngokhokho bethu engxenye ubuntu bethu sesizabulonda ngendlela eyiyo engaseyiyo leyana kade sibulonda bonke, ngingathi ngesikhathi seLand Husbandry Act eka1951 yikho lapho okasuka imithanithani yonke.”
Umkhokheli wezinduna kudale leChiefs Council induna uMtshana Khumalo ukhuthaze uKwagatalala ukuthi ahlalisane kuhle lozulu njalo ahloniphe lomongameli welizwe.
“Osayinayo ukuthi ubeyinduna nguPresident welizwe, okwakathesi ngubaba uMnangagwa umongameli , singahlala izinduna kwesinye isikhathi siyalibali sibone sengathi sakudobha esitaladeni okuyizinto lokhu, besesihamba sihlayaza upresident lapho esihamba khona, ngifuna ukuxwayisa abanye bani ukuthi nxa sile nsolo silendawo lapho esikhulumela khona, angithi okukhethayo ulakho ukukususa nxa ungasamhloniphi.”
Umphathintambo obona ngokwakhiwa kwezindlu lenhlalakahle kazulu, uMnu. Daniel Garwe, uthi ukugcotshwa kuka Kgwatalala kugcwalisa izifiso zikaMongemeli Emmerson Mnangagwa zokulondoloza imbali lamasiko akuleli.
“Lamhlanje lilanga elikhulu eliqakathekileyo kithi sonke esibuthane lapha sibuthana lapha sigcwalisa izithembiso zikamongameli Mnangangwa esokuthi ubukhosi bethu bomdabu osebucitshiwe ngabahuquluzi uzabubisela ngalokhu yikho okwenzakalayo lamhlanje.”
Induna uMbiko Masuku ukhuthaze uKgwatalala lesigaba sakhe ukuthi basebenze ndawonye.
“Nansi isizwe sizile ukuzokwamukela okutsho ukuthi sivumile ukuthi wena usikhokhele , bakhokhele ke baba lababantu bakhokhele kuhle lani vumani ukukhokhelwa, likhokheleke ukuze impilo ibelula, kungani ngisitsho njalo ngoba inkosi yinkosi ngabantu nxa kungela bantu abakho ubukhosi.”
UNkosikazi Mamoreng Maharaswa odabuka eFree State kwele South Africa ngomunye oze kulumkhosi.
“Siyajabula ukuba lapha ukuzethula isipho kuNduna uKgwatalala, size lesipho sengubo ,sicela nkosi ulalele, ubelenhliziyo enhle lothando siyacela lawe uzulu ukuthi umthande njalo umlalele.”
Kusenjalo, uhulumende usesungule indawo yolulwisana lesomiso esikhona ngemva kokuvulwa ngokusemthethweni indawo yeGaranyemba Ward Drought Mitigation Centre elesivande kanye lendawo zokudlela lezamanzi ezifuyo.
Evula ngokusemthethweni lindawo, umsekeli kamongameli, uMnu. Kembo Mohadi, uthe ukusungulwa kwalindawo kuzahlenga izifuyo ezinengi esezihlaselwe yindlala.
UMphathintambo wezokulima uMnu. Anxious Masuka laye obekulumkhosi uthi inkomo ezifika phose izigidi ezintathu – 2,5 million zilakho ukubulawa yndlala elizweni lonke jikelele lonyaka ngenxa yesomiso esikhulu esaphehwa yisikhudumezi somkhathi ese-El Nino.
SEE ALSO:
Udaba Esilwethulelwe NguAlbert Ncube