Kubhubhe abantu abangamatshumi ayisikhombisa lanhlanu, 75, ngeCovid-19 eZimbabwe ngoMvulo njalo kwatholakala abedlula inkulungwane ezimbili, 2,113, belomkhuhlane lo.
Lokhu kukhweze inani lasebefile laya kunkulungwane ezimbili ezilamakhulu phose ayisikhombisa, 2,697.
Asebebanjwe lumkhuhlane bona bakhwele baya kunkulungwane ezedlula eziyisitshiyangalombili lanhlanu, 85,732.
Abahlatshwe ijekiseni yakuqala yokuvikela lumkhuhlane ngoMvulo bedlula inkulungwane ezingamatshumi amane, 40,056.
Abahlatshwe eyesibili bazinkulungwane ezedlula kancane ezimbili, 2,049 kuphela.
Abantu asebehlatshwe ijekiseni yakuqala bonke sebengu1,184,435 kuthi asebehlatshwe eyesibili njalo ingeyokucina bona sebengu643,203.
Umkhuhlane lo usabalala ngamandla kulezinsuku njalo esibhedlela seMpilo koBulawayo usuhlasele odokotela labongi abangamatshumi ayisithupha lantathu, 63.
Inkundla yeNewzWire ibike ukuthi uhulumende usezaphoqa izisebenzi zakhe zonke ukuthi zihlatshwe ijekiseni yeCovid-19.
Isiphathamandla senhlanganiso yezakhamizi zeLupane uNkosazana Florence Magagula utshele iStudio 7 ukuthi uhulumende kumele afindise abantu ngokuqakatheka kokuhlatshwa ijekiseni ngoba kulabanye abalokhe besala ukuhlatshwa.
Your browser doesn’t support HTML5
Ingxoxo loNkosazana Florence Magagula