Kubhubhe abantu abangamatshumi phose amabili, 19, ngeCovid-19 eZimbabwe ngeSonto.
Kutholakale njalo abangamakhulu amabili alamatshumi amathathu lanhlanu, 235, belomkhuhlane lo.
Lokhu kukhweze inani lasebebulewe yi-coronavirus kulelilizwe laya kunkulungwane ezedlula ezine, 4,109. Asebebanjwe lumkhuhlane sebesedlula inkulungwane ezilikhulu elilamatshumi amabili, 120,088.
Abahlatshwe ijekiseni yakuqala yokuvikela lumkhuhlane izolo bazinkulungwane ezingamatshumi phose amathathu, 28,015.
Abahlatshwe eyesibili labo bazinkulungwane ezingamatshumi phose amathathu, 26,334.
Asebehlatshwe ijekiseni yakuqala bonke sebephezu kwezigidi ezimbili, 2,064,314 kuthi asebehlatshwe eyesibili njalo ingeyokucina sebephezu kwesigidi, 1,224, 715.
Isiphathamandla senhlanganiso yeCitizens Covid-19 Monitor uMnu Effie Dlela Ncube uthi lanxa inani lababanjwa lumkhuhlane kanye labafayo likhanya selisehla, uzulu kamelanga ayekethiseni.
Your browser doesn’t support HTML5
Ingxoxo loMnu Effie Dlela Ncube
Kusenjalo, ibandla leMDC Alliance selithumele amazwi enduduzo emulini yentathelizindaba yeStudio 7 uKudzanai Musengi yena obhujelwe nguNkosikazi wakhe, uyisezala kanye loninazala ngeviki edluleyo.
Abathathu laba bathethwe ngumkhuhlane weCovid-19 belandelana.
Umsekeli wesikhulumeli salelibandla uMnu Felix Magalela Mafa Sibanda utshele iStudio 7 ukuthi bakhala kanye lomndeni wakoMusengi.
Your browser doesn’t support HTML5
Ingxoxo loMnu Felix Magalela Mafa Sibanda