Kulabantu abayisitshiyagalolunye ababulawe yiCovid-19 eHarare kanye labangamatshumi edlula ayisikhombisa, 73, ababanjwe lumkhuhlane izolo.
Ugatsha lwezempilakahle luthi abantu laba babhubhe kunsukwana ezedluleyo.
Lokhu kukhuphule inani lasebedliwe yilumkhuhlane eZimbabwe laya kumakhulu edlula kancane amathathu, 303.
Phakathi kwababanjwe lumkhuhlane izolo, abangamatshumi amathathu lantathu ngabakoBulawayo njalo abangamatshumi amabili lasitshiyangalombili ngabeMashonaland West.
EMatabeleland South kulababili, oyedwa eMatabeleland North, ababili eMidlands, abathathu eMasvingo, oyedwa eMashonaland East kanye lababili eMashonaland Central.
Kulabangamatshumi ayisitshiyagalolunye njalo abafunyanwe sebepholile. Inani lasebebanjwe lumkhuhlane selokhu waqhamukayo likhwele laya ku-10912.
Asebepholile bona bakhwele baya ku-9062 kuthi abalokhe begula behle kancane besuka ku-1573 baya ku-1547. Umkhuhlane lo ukhanya usumemetheka ngamandla kuleli lasemhlabeni jikelele.
Inhlanganiso ezitshiyeneyo ziphakathi kokuqhuba inhlelo zokuphathisa uzulu ngendingeko zokuzivikela kulumkhuhlane ezifana lama-sanitizer.
Enye yalezinhlanganiso yiZimbabwe Christian Alliance ephe ama-quarantine centers aseVictorial Falls uncedo lolu ngoMvulo.
Isiphathamandla salinhlanganiso uMnu Useni Sibanda utshele iStudio 7 ukuthi bakhethe idolobho leVictoria Falls ngoba lisengozini enkulu yeCoronavirus nanku liyindawo egcwala izethekli lezihambi ezivela endaweni ezitshiyeneyo.
Your browser doesn’t support HTML5
Ingxoxo loMnu Useni Sibanda