Umongameli weMelika uMnu Joe Biden uthi akasoze ehle esikhundleni sokuncintisa kukhetho lukamongameli, lapho azancintisana khona lowayengumongameli uMnu Donald Trump ngemva kokuba uBiden engaqhubanga kuhle kungxoxo-mpikiswano yabo yakuqala. Intathelizindaba yeVOA uScott Steanrs ukhangela ukuthi abavoti bakubona njani lokhu.
Umkhankaso kaBiden uphikisana lenkuthazo yokuthi uBiden adedele omunye kulolukhetho kulandela ukungaqhubi kuhle kungxoxo-mpikiswano, sekubhadalwe izigidi ezingamatshumi amahlanu zamadola i-$50 million eyokukhankasa kumisakazo ngenyanga kaNtulikazi njalo kuqiniswe umkhankaso kuyonaliviki.
UBiden utshele abakade bebuthanele umkhankaso wakhe eWinconsin ngoLwesihlanu ukuthi uzaqhubeka ngalumkhankaso.
Ozavota uSabrina Jordan uthi uBiden ulokhu elamandla okukhokhela, "Akumelanga aguquke. Kumele ahlale enjalo, angeke ngithi ekele ukulalela uzulu, kodwa kumele abe phakathi laphakathi, kumele abatshele abantu ukuthi akayindawo njengakwenzileyo namuhla. Njalo nxa kungela lutho olutshintshileyo, ngizamvotela."
Omunye ozavota uJonathan Lustag ubengakabi lecele aselithethe, “Isimo sakhe siyakuveza ukuthi usetshintshile. Akula kubuyela emuva. Asikhuli sibuyela emuza. Awungeke ulwisane lokuguga."
Ukubona uBiden eseqhubeka ngomkhankaso ngemva kwengxoxo-mpikiswano akuphi ithemba kulunga lamaDemocrats elizavota u-Ellis Johnston, “Angila themba lokuthi uBiden uyenelisa ukunqoba kulolukhetho, njalo lokho kungitshiya ngilokwesaba."
Abasekeli bakaTrump bona bathi ukungaqhubi kuhle kukaBiden kungxoxo-mpikiswano kuqinisa imibono yabo eyokuthi uBiden kangeke enelise ukubusa njalo okweminye iminyaka emine. Umvoti weCalifornia uLamont Pearson uthi, “Akulalutho olungaphuma emlonyeni kaBiden olungaguqula lokho asengitshengise khona. Bonke loTrump.”
Indlela uBiden aqhuba ngayo kungxoxo-mpikiswano iyingxenye nje kuphela yokwenzakalayo kutsho omunye umvoti weGeorgia uJeffrey Tanarelli, “Ngibona sengathi uBiden uyalithanda ilizwe lakhe njalo ngumuntu ohlakaniphileyo. Ngibona sengathi kaqhubanga kuhle ngoba wayengenelisi ukwenza okwakukhangelelwe njalo indlela aqhuba ngayo iyakuveza obala lokhu."
Ukuswela amandla kwakhe kutshiya omunye umvoti weWashington, D.C., uHannah Sobolevitch esamukela umqondo wokuthi adedele omunye, "Kwabamngceke kimi ukuthi uBiden akaselawo amandla. Njalo ngingasekela ngcono ibandla nxa lingafaka omunye umuntu endaweni kaBiden.”
Nxa amaDemocrats ezakhetha omunye umuntu ukuthi athathe isikhundla sikaBiden kumele akwenze lokhu ngokuphangisa kutsho umvoti weMichigan uLexis Zeidan.
“Kulengxoxo okufanele zenziwe kunyanga ezayo ukuthi ibandla lamaDemocrats lingenza njani ukubambanisa amalunga alo lilungiselela ukhetho, nxa lokhu kungenzakalanga uTrump engabusa,” kutsho uLexis.
Umsekeli kaBiden azangena laye kukhetho uKamala Harris ngomunye wabangadedelwa nguBiden kulesisikhundla. Kodwa lokhu kulakho ukungasebenzi, kutsho umvoti weCalifornia uStephanie Bowers.
UStephanie uthi, “UKamala ubengathatha, okuyinto ebengingayithanda. Kodwa okusemicabangweni yabantu ukuthi uTrump enganqoba uKamala ukwedlula uBiden yikho okungamisa lokhu."
Ngesikhathi umkhankaso wabaDemocrats uqhubeka usekela uBiden, umka mongameli uNkosikazi Jill Biden uzaqhuba umhlangano lemuli zebutho ezigabeni ezintathu kuyonaliviki njalo kuzakuba lemihlangano labavoti eTexas leNevada ngesikhathi kukhangelelwe umhlangano umkhulu oweConvention eyebandla lamaRepublican.
SEE ALSO: Lalela Okugcweleyo Ngaloludaba