Inkokheli yabalwa impi yenkululeko eye National Liberation War Veterans Association ithi kabayikuvumela ukuphenduka kwabelungu abathathelwa umhlabathi, besebenza lezizalwane zeZimbabwe ezizenza abanini balawo mapulazi.
Abenhlanganiso yabalwa impi yenkululeko laba bakhuthaza uPatron wabo, umongameli Robert Mugabe ukuthi abumbe iqula labazahlolisisa amapulazi agombolezele amadolobha awe Harare le Bulawayo lamanye wonke ilizwe lonke, kuphathise ekuvezeni ubumenemene obukhona busenziwa ngabantu abanye babo kuzinkokheli zeZanu PF.
Lokhu kuvezwe yinkokheli yeZNLWVA emhlanganweni lentathelizindaba owenzelwe e Harare Club.
Ubekhona emhlanganweni lo, umgcinisihlalo we ZNLWVA esigabeni sako Bulawayo, umnumzana Cephas Ncube.
Ukwenza kwabasebenzalana labelungu laba, uNcube uthi yibumenemene osebusenziwa, beyengwa lokudlelezelwa ngabokuza. Esola izinqumo ezithathwa, emithethwandaba kunxabano eziphezu komhlabathi.
Umgcinisihlalo esigabeni se Matebeleland North enhlanganisweni inye, umnumzana Sani Mguni uthi akusizi ukuthatha izinqumo eziphathisa abalutshwana, uzulu esale ebambe uboya.
Kumele kulwiswe ngandlela zonke ukungathembeki lobumenemene elizweni kungakhathalekile ukuba kwenziwa ngubani kuveza uMguni.
Bathi yikhona bezawabetha amagama amalunga enza lobu bumenemene, abanye babo kungabalwa impi yenkululeko ngemva kokuba sebeyebonana lomongameli Mugabe ukumazisa ngaloludaba.
Abe ZNLWVA bathi bayazi mhlophe ukuba abanye balaba bantu ngabasebenza lombuso wabancindezeli ilizwe lingakatholi uzibuse, ngesikhathi bona labanye besempini yokukhulula ilizwe.
Your browser doesn’t support HTML5
Udaba lomhlabathi labalwa impi yenkululeko