Isicelo sokuba umkhokheli webandla le Transform Zimbabwe uMnu. Jacob Ngarivhume aphiwe imvumo yokuhlawula isibambiso sebheyili sesikhangelelwe ukwethulwa ngoLwesihlanu.
Uhulumende uyala ukuba uNgarivhume aphiwe leyo mvumo esithi ulakho ukukhipha uMongameli Emmerson Mnangagwa esikhundleni njengoba sekuleqembu leJuly 31 Movement elilakho ukumsekela kulokhu.
UMantshi Trainos Utahwashe utshele iqwetha likauNgarivhume ukuba kunengi osokuguqukile lokhe umkhokheli we Transform Zimbabwe wavalelwayo esithi uzahlala phansi abhekisise ukuba amnike ibheyili ngoLwesihlanu loba hatshi.
Iqwetha lika Ngarivhume, uMnu Moses Nkomo utshele intathelizindaba ukuba uthwele nzima ejele lapho avalelwe khona ngoba engavunyelwa ukuba izihlobo labangane bazembona.
“Sisebe lodubo ukuba balalele lokho okutshiwo lidale. Walelwe ukuba avakatshelwe, bamalele ukuba siphathele ukudla, bathi ukudla kuthengwe ku internet. Kuyadula lokhu, ngoba abanye bathi $20US ukuba kuthwalwe ukudla kwakhe.
Uqhubeke echasisa ngesimo sika Ngarivhume esithi bazakuya edale laphezulu nxa abemajele bengayala bethwalise kanzima yena engelacala.
“Siyazama ukuba silungisese udubo alalo ikakhulu ukuba athole ukudla lokuba abantu abafuna ukumvakatshela bavunyelwe e Chikurubi”
Umtshutshisi uMnu Michael Reza uthi uNgarivhume kumele ancitshwe imvumo yokuhlawula ibheyili ngoba sekuleqembu le July 31 Movement lona elinkankasela ukuba uzulu we Zimbabwe eqhubeke etshengisela okuyinkuthazo eyasungulwe nguye.
UReza uthe uMongameli Mnangagwa ulokhe esesikhundleni sakhe esithi kungaba yingozi nxa u Ngarivhume engakhululwa acine esefeza injongo yakhe yokumkhupha okungekho emthethweni.
UNgarivhume kanye lentathelizindaba uHopewell Chin’ono sebefikisa amaviki amathathu bevalelwe besetheswa icala lokufuna ukugenqula uhulumende ngokukhuthaza uzulu ukuba angene ezithaladeni atshengisele okwakuhlelwe ukwenziwa mhlaka 31 Ntulikazi kodwa akusaphumelelanga ngoba uhulumende wabopha lokuhlukumeza labo ababelungisela ukutshengisela lokhu.
NgoLwesibili uHopewell Chin’ono uzakupha ubufakazi ecaleni lesicelo sikahulumende sokuvimba ukuba ammelwe ligqwetha uNkosikazi Beatrice Mtetwa esithi wephula iziqondiso zedale ngokubhala okwenzakalayo enkundleni yokuxhumana eyebulenjini eyeFacebook ekhasini lakhe. Lokhu uyakulandula uMtetwa esithi kasilo lakhe lelo khasi lavulwa ngulowo oqondisa ifilimu yempilo yakhe.