NgoLwesithathu abasekeli bebandla leZanu PF kunye lenkokheli yalelibandla ibikhangelele ukuthi ukudonselana amandla okusebandleni leli kuzafika komlindi uyacina ngemva kokuba amaxuku adonselana amandla efungelane ijoyi elinye lisithi umhlangano obuqoqiwe luhlangothi lwabesifazane awusoze wenziwe.
Ukuhlaziya loludaba uChris Gande weStudio Seven uxoxe lengcwethi ecubungula ezombusazwe, uMnu. Dumisani Nkomo.
Your browser doesn’t support HTML5
Ingxoxo loMnu. Dumisani Nkomo
Kodwa uzulu kunhlangothi ezehlukeneyo uthi udaniswe yindlela umongameli Robert Mugabe aphathe ngayo loludaba.
Abanye bathi bekumele uMongameli Mugabe lenkokheli yebandla lakhe bakhuthalele ukudinga indlela zokuthuthukisa umnotho welizwe lokuphathisa ngesikhathi salendlala ilizwe libhekane layo hatshi ukube lokhe kubangisanwa izikhundla ilizwe lisiya nganxele.
Bathi ukuphoselana aqatha lokhu sekufike kusibanga esibi njalo kungaphathisi ntuthuko yelizwe.
Uzulu okhulumisane le Studio Seven uthi akufunayo yikubona inkokheli ye Zanu PF iphatheka kumpi yokudinga indlela ezingathuthukisa umnotho welizwe lezingasetshenziswa ukudinga ukudla ngalesi sikhathi sendlala.
Inkokhokheli yelinye lamabandla aphikisayo ,uDr Hurayayi Zembe owe Democratic Party uthi ukwenza kukaMongameli Mugabe ngoba kungekho vele abengakwenza ngoba kutshotshozelwa nguye ngasese.
UZembeuthi kungamaqhinga kamongameli Mugabe, athi uhlezi ewasebenzisa sikhathi sonke ukucatsha ngabanye abantu evoxa umumo ngabomo,ngendlela yokuba ale esesikhundleni akiso abanye bephethe bedlephana.
Lokhu kusekelwe ngunobhala jikelele webandla le People’s Democratic Party – PDP, uDr Godern Moyo othi ukube lokhe zithukana sikhathi sonke lezinkokheli akusizi lutho ngoba kubuyisela muva imizamo yokuthuthukisa umnotho welizwe.
UMoyo uthi endaweni yokube lokhe kuphoselanwa amagama aqatha kumele kube yisikhathi sokuba uhulumende weZanu Pf asebenzelane laye wonke umuntu,kungakhathalekile ukuba ungowaliphi ibandla.
“Phakathi kwethu ke,kukhona abantu ababenga,abale experience enjalo.E,lakwamanye amaparties bakhona futhi,abafisa lokuthi iZimbabwe iphume phakathi kodaka lohlupho lokuswela imisebenzi,lama industry ephela,imikhuhlane konke labo President asebephelile,yikho ke kunzima elizweni leli,” kutsho uMoyo.
Umnumzana Gift Siziba ngomunye wengcwethi kwezombusazwe ezisole ukwenza kukamongameli Mugabe.
USiziba uthi besingekho lesizatho sokubuthanisa abalandeli bebandla belethwa ngamabhasi angamatshumi ayisithupha emhlanganweni wokuncoma umongameli kumisebenzi ayiqhube ngesikhathi engumgcinisihlalo womanyano we AU ngoba kungekho okubonakalayo athe akwenza kumanyano lo.
USiziba uthi okumangalisayo yikuba uMugabe waxotsha owake waba ngumsekeli kamongameli, unkosikazi Joice Mujuru, engaphiwanga ithuba lokukhalaza kulandelwa indlela zebandla.
Kodwa, uthi uMugabe nguye osengothi abathukanayo laba babokusa udaba lwabo kudale elithonisa amacala kubandla hatshi ukukhulumisana ngendlela zakulezinsuku ezobulenjini.
Manje so sikhangelele ukuthi sehluleke kakhulu njengeZimbabwe ukuthi simekhe sure ukuthi eh,amahuman rights ayaphanyiselwa phezulu,amalungelo abantu,sehlulekile thina i Africa yonke.Njalo uma likhangela i African Union,ile esingathi ngumzimba,okuthiwa yi APSA,i African Union Peace and Security Council,iyehlulekile yona ukuvimbela.
“Ngoba singakhangela umongameli ubebizwa lapho okungelamsebenzi khona,ubebizwa lapho okufanele singathi thina ukuyaxoxa ,singathi kuyakhulunywa abathi yizilogans.Ubengabizwa lapho lapho oku serious esingathi ngama Troika Summit,yikho lapho okuqakathekileyo okusebenza khona i APSA khona eye African Union,ukurisolva innkinga ezenzakala amazwe wonke jikelele kwele Africa,” kutsho uSiziba.
UVusumuzi Moyo,ongunobhala kwezokuhanjiswa kwemibiko ebandleni le MDC elikhokhelwa ngumnumzana Morgan Tsvangirayi uthi okwenzakale emhlanganweni wangoLwesibili esogodlweni seZanu Pf eHarare,kungeyisikho obekukhangelelwe nguzulu.
“Khathesi esikudingayo,sikhangele inhlupheko ezihlupheka ngabantu beZimbabwe,yikuthi sonke sibambane. Esikudingayo yikuthi sivuselele ihope.Singakhangeli,mhlawumbe okungabe kwenzakala ngezikhathi ze congress nxa sikhangele thina nje ngeparty,singakhangeli lokho okungabe kusenzakala phakathi kwalabo abasibusayo abeZanu Pf,” kutsho uMoyo.
Umqondisi wenhlanganiso ye South Western Region Gender Networks ( SWERGN ), unkosikazi Chelesile Nyathi, uthi okudingwa nguzulu weZimbabwe, kakhulukazi abesifazane, yikuba inkokheli ivuselele umnotho welizwe.
Kutsho uNyathi: “Ubuhlungu bakhona,liqiniso ukuba nxa ubala iminyaka leyi,35,ngumuntu phela oselomuzi wakhe,nxa kungumuntu owazalwayo nxa engumuntu owazalwayo.Kumele ukuthi ngabe usumbona ukuthi khathesi awusamnakekeli,uselabantwabakhe,usezimele yedwa lapha but thina lokhe sihlupheka. Ngokubona kwami,uh,umkhonomi wethi,ezomnotho,kuyasilela kakhulu kakhulu,kwelakithi lapha.
“Bakhona abathi kuyadanisa ukuba ngabesifazane abasetshenziswa sikhathi sonke ukutshotshozela impi lapho umongameli Mugabe efuna ukufeza izifiso zakhe, kanti abalahlele le nxa esekutholile akufunayo”.
Unkosazana Virginia Phiri ,ongumlobi olodumo, uthi okufunwa ngabesifazane yikuba imihlangano yaloluhlobo isetshenziswe ukukhulumisana phezu kokungenziwa ukuguqula isimo kwezomnotho ukuze banelise ukunakekela imhuli zabo.
“Sinyathela ngaphi,kanti vele siyaqilana loba kasiqilani,ngoba isikhathi siyahamba.Kuzaze kube nini sokungama 35 years i independence yafika yaqoqoda.Kodwa ke omama kuthiwa kwatsha umsobho kwasala amaqatha,imithetho ikhona kodwa kayisebenzi.
Likhangele amazwe amanye,esiwabonayo,agijinyiswa ngomama,uyafica kungamanyala,ethi engathatha umama lowana,and kufuna umama olesineke,abe lomoya wakhe okhululekileyo,olesineke owazi abantu.Umuntu wabantu,hayikhona ukuthi ngesinye isikhathi usuke ingani usuhlambaza abantu,hayi akusebenzi lokho,” kutsho uPhiri.
Uzulu uthi umangaliswe yikungazihluphi kukamongameli Mugabe,ekukhuzeni kukammeli we Hurungwe East edale lephalamende, uNkosikazi Sarah Makuka lapho ehlambaza enye inkokheli okubalisa umsekeli kamongameli Mugabe, umnumzana Emmerson Munangagwa.
Okunye okumangalise abanengi yikuba umongameli Mugabe ekutshaye indiva lokho okwenzakala phakathi kwebandla lakhe, okwenza abanye bakholwe ukuba nguye umnini wakho lokho okwenzakalayo ngoba kukhanya sobala ukuthi kuyamphathisa ukuthi ale esesikhundleni enye ionkokheli ixophana.
Your browser doesn’t support HTML5
Udaba Silethulelwa nguMavis Gama
Ukuhlaziya loludaba uPraxedes Jeremiah oweStudio Seven uxoxe loMnu. Thembinkosi Sibindi owebandla le MDC-T endawonye lelunga le Central Committee yebandla leZanu PF, uMnu. Joseph Tshuma onguye osungula lingxoxo.
Your browser doesn’t support HTML5
Upraxedes Jeramiah Exoxa LoMnu. Thembinkosi Sibindi endawonye loMnu. Joseph Tshuma