Ezinye zezizalwane zeZimbabwe eziseBotswana zithi noma nje kulenjabulo emulini kamongameli Robert Mugabe, inanza ilanga lakhe lokuzalwa, akulasizatho sokuthi zithokoze ngoba okwazixotshayo elizweni kulokhe kungakalungiswa
Ngesikhathi kukhala ifologwe lenqamu kulokujabula emulini kamongameli Robert Mugabe lapho efikisa iminyaka engamatshumi eyithoba munye mune lambili (92), abanye abasemazweni bakhala ngokuthi abasiboni isizatho sokujabula.
Umbiko owethulwe yiBotswana ngeviki edluleyo, uveza ukuba phakathi kwenani lababuya elizweni ngenyanga elikhulu inani ngelabeZimbabwe inengi labo elizodinga umsebenzi.
Inengi labo lizithola lisidla imvuthu kukanti ekhaya kungathembisi ukuthi umumo uzaguquka kusikhatshana esifitshane esilandelayo kodwa kuzwakala umsindo wama magilasi enjabulo emzini kamongameli Mugabe kuthakazelelwa ilanga lakhe lokuzalwa.
Osakhulayo umnunzana Jefris Ngwenya uthi noma nje befisela umongameli Mugabe ilanga elihle lokuzalwa, sesitshayile isikhathi sokuthi ayephumula ngoba inkinga zeZimbabwe sezifuna igazi elitsha.
“Sithanda ukuthi langa lokuzalwa elihle kumongameli wethu kodwa ngokubona kwami isikhathi sakhe sesitshayile kumele ayekudla impentsheni njengabanye bentanga yakhe”.
Kukanti omunye umnunzana Ntokozo Hlabangana uthi noma nje kulilanga elihle kumongameli Mugabe izikhathi sezitshayile ukuthi ahlale phansi anikeze omunye njengoba iminyaka isitsho.
“Kuyinto enhle ukuthi ukhulu uphiwe imnyaka eminengi. Kodwa njengoMandela owabusa watshiya ngabe laye useqhubela omunye ukuthi aqhubekele phambili”.
Unkosikazi Sithembile Tshuma yena uthi umongameli Mugabe engakhohlwa izigidi ezingaphandle kwelizwe ngesikhathi esika ikhekhe lelanga lokuzalwa.
“Mongameli Mugabe lapho usika ikhekhe lakho lokuzalwa ungasikhohlwa thina esingaphandle esikhitshwa ngumumo welizwe’.
Isimo esibi sesombusazwe lesomnotho eZimbabwe sesibambe ngamandla izigidi lezigidi zabantu elizweni zisiyadinga okungaphilisa imuli kwamanye amazwe womhlaba.
Umongameli Mugabe uzaba ufikise iminyaka engamatshumi athoba mune munye lambili yokuzalwa mhlaka 21Nhlolanja kodwa idili lokuthakazelela ilanga lakhe lokuzalwa lizakhwenzelwa eMasvingo ngempela viki lapho okubikwa kuzasetsehnziswa phose isigidi samadola eMelika, okuyinto esolwa kabi ngabanengi ngesikhathi ilizwe libhekane lendlala embi lonyaka, abanye besithi ngabe leyo mali ithengela abantu ukudla.
Your browser doesn’t support HTML5
Udaba lwabeZimbabwe abaseBotswana abasola ukwenziwa kwedili lelanga lokuzalwa likaMugabe