Uzulu we Zimbabwe unanze usuku lamaqhawe eleHeroes Day, ngoMvulo, okungokwakuqala selokhe owayenguMongameli uMnu Robert Mugabe wabhubhayo. Kodwa uzulu uthi ilanga leli vele kalitsho lutho ngoba injongo yamaqhawe yokuya empini yokukhulula eleZimbabwe lokhe ingakafezwa.
Ilanga lokukhumbula amaqhawe lonyaka kalizange libe lombuthano omkhulu njengemvama, ngenxa yokuqhamuka kwegciwane leCovid-19. UMongameli Emmerson Mnangagwa wethule umbiko wakhe oqakathekileyo wokunanza leli langa emsakazweni we ZBC.
UMnangagwa uthe uhulumende usenquma ukwakha izithombi zokukhumbula amaqhawe awomvukela wakuqala wamaNdebele afana lenduna uMtshane Khumalo, uMakoni, iNdlovukazi uLozikheyi Khumalo, Mgandani Dlodlo uKaguvi, Chaminuka labanye njengalokhu okwenziwa isithombe sika Mbuya Nehanda eHarare.
Njengenjayelo usole izijeziso zomnotho ezafakelwa eleZimbabwe ngamazwe aphetsheye afana le Melika esithi ziyenza umthwalo wokugcwalisa izifiso zikazulu ube nzima.
Kodwa uzulu usole kakhulu isimo esiseZimbabwe okwamanje ngesikhathi sokunanza usuku lamaqhawe. Omunye wabasola indlela ilizwe elimi ngayo ngu Mnu Iphithule Maphosa isikhulumeli webandla le ZAPU yena othi amaqhawe e Zimbabwe afela ize.
“IZimbabwe esiyibona namhlanje iyasethusa, isiyangisa iphinde isizwise ubuhlungu njengabantu be ZAPU abalwelwa leli lizwe. Amaqhawe awafayo afela ize ngoba iZimbabwe esesiyibona namhlanje igcwele ubugova, ubusela lenkohlakalo”
Unobhala webandla le Zimbabwe Communist Party uMnu Ngqabutho Mabhena uthe kuyadanisa ukuba uhulumende ka Mnangagwa usebhadala amakhiwa imali yomhlabathi wona owawuyinjongo enkulu yempi yenkululeko.
“Labo abalwayo nxa bengavuka bengethuka ukuba yikho na abakulwelayo lokhu. Amaqahwe alwela ukutrhi umhlaba ube sezandleni zabantu. Uhulumende ka Mngangagwa unika amakhiwa imali efika 3.5 billion dollars eyokubhadala umhlaba abawuthathayo.”
Ingcitshi ecubungula ezombusazwe uMnu Richard Mahomva uthe intsha kumele icabangisise kabanzi ngelanga leli.
“ Leli langa lisikhumbuza ukuthi ilizwe lethu lathola inkululeko ngendlela enzima. Phezu kwakho konke lisifundisa isifutha sokuthanda ilizwe. Intsha ye Zimbabwe kumele izikhangelisise ibone ukuba ilesifutha na esasilalabo abalelwa impi”
Osakhulayo uMnu Munashe Mtutsa uthi kuqakathekile ukuba abatsha bafunde ekuzinekeleni kwamaqhawe wona awalwa empi besesengabantwana.
“Amaqhawe lawa ungananzelela ukuba bahamba bengontanga. Ontanga kumele bebe lesifiso sokukhulula ilizwe. ONkomo, oMugabe balwela ilizwe leli bebancane. Sifunda ukuba abantu bebambane ukulwisana lobubi obuyabe bukhona”
Ilanga le Heroes Day linanzwa minyaka yonke ngenyanga ka Ncwabakazi kulenkuthazo yokuba uzulu akhumbule abanengi abalwela uzibuse weZimbabwe. Abanengi elizweni kabasaliqakathekisi kangako leli langa besithi lisetshenziswa yi ZANU PF ukufihla okubi okwenziwa nguhulumende elizweni uzulu ehawula, okunjengenkohlakalo. Abanengi bathi uhulumende kaselaso isineke okumele abe laso esatshengiswa ngamaqhawe alwelwa impi yenkululeko.
Obona ngokwethulwa kwemibiko ebandleni leZanu PF umnumzana Tafadzwa Mugwadi uthi indawo ebekwa amaqhawe esizwe eye National Heroes Acre, eseHarare, izaqhubeka iqakathekiswa lanxa amanye amaqhawe anjengoMnu Robert Mugabe engabekwanga khona.
Lokhu akwehlisi isithunzi sokuba liqhawe kwabo nanku kulamanye amaqhawe aphiwa inhlonipho yeqhawe lesizwe kodwa akhetha ukubekwa kwezinye indawo ezingasizo Heroes Acre abafana lomuculi owayeludumo uOliver Mtukudzi, uSikwicamfundo Phineas Makhurane labanye.