Umculi olodumo, uBhekizizwe Joseph Shabalala, oweqembu leLadysmith Black Mambazo, kasekho.
Iphephandaba leTimes lakwele South Africa libika ukuba uShabalala ubhubhele esibhedlela ePretoria. Umqondisi weqembu leLadysmith Black Mambazo, uXolani Majozi, uthi umdeni wakhe leqembu leli kanye lomhlaba wonke jikelele balahlekelwe yindoda emadodeni. Kavezanga ukuthi uShabalala ubulewe yisifo bami.
Banengi abantu kwele Zimbabwe abadabuke inhliziyo. Omunye wabo nguMoffat Phiri, owake wasebenza emsakazweni weZimbabwe Broadcasting Corporation.
UPhiri uthi zinengi ingoma zeqembu leli ayezithakazelela.
Kasuye yedwa uPhiri odabuke inhliziyo. UDesmond Ntini, osebenza labaculi abatshiyeneyo, uthi uShabalala utshiye abantu besamthanda okumangalisayo.
Uthi kunengi abakufunda kumuyi njalo wayewuthakazelela umculo weqembu leli.
UShabalala wazalwa ipulazini elise Ladysmith Kwazulu Natal ngomnyaka ka1941. Wakhula esebenza epulazini likayise lapho ayehlabela khona umculo wakwazulu labanye bakhe.
Lokhu kwenza ukuthi athakazelelwe nguzulu njalo abumbe iqembu leLadysmith Black Mambazo ngama 1960s. Wasebenza gadalala labanye bakhe badinda amadlalade afika amatshumi ayisithupha.
Wasebenza labahlabeli abanjengo Dolly Parton, uMichael Jackson, Stevie Wonder kanye labalingisi ababalisa uEddy Murphy, Clint Eastwood labanye. Okwenza iqembu lakhe liphumelele yikucula kwalo loPaul Simon owaloba labo ingoma ethi Graceland lezinye.
Iqembu leli lathola izicoco ze Grammy Awards ezinhlanu lezinye ezilohlonzi. Utshiye umkakhe labantwana abakuqembu leLadysmith Black Mambazo alitshiya ngomnyaka ka2014 esithi usekhulile.
Your browser doesn’t support HTML5
Uzulu UKhalela Umdeni Kamuyi uJoseph Shabalala