Izulu seliqalile ukuna endaweni ezitshiyeneyo zelizwe njalo uhulumende uthi abantu sebengalima ikakhulu lapho osokune khona isilinganiso esiphezu kwama-millimeters angamatshumi amabili, 20 millimeters, phakathi kwamalanga amathathu.
NgoMvulo langoLwesibili litshone lisina endaweni ezinengi eMatabeleland North, eMatabeleland South, koBulawayo, eHarare, eManicaland laseMasvingo.
Ugatsha olubona ngezomkhathi olweMeteorological Services Department lwazise ukuthi izulu leli lizakuna elizweni lonke iviki le ize iyephutsha.
“NgoLwesithathu kukhangelelwe ukuthi inani lezulu lizakhuphuka eMashonaland laseHarare,” kutsho isiphathamandla sogatsha lweMeteorological Services Department uMnu Linos Ncube uthi.
“Kwezinye indawo zeManicaland, eMasvingo leNkabazwe kukhangelelwe izulu elizakuna ngesilinganiso esedlula i-50 milimeters ngemva kwamahola angamatshumi alabili lane, 24 hours.”
UNcube uxwayise abantu ukuthi beqaphele futhi bathathe amanyathelo aqondileyo ngesikhathi ukuze baphephe engozini ezifana lokutshaywa ngumbane kanti njalo bengalingi bechaphe imifula egcweleyo.
Abantu abanengi besebelahlekelwe lithemba lokuthi izulu lizakuna nanku isikhathi sokulima sifike sedlula ekupheleni kwenyanga edluleyo umkhathi womile.
Ingcwethi kwezokulima uMnu Mandla Nkomo uthi njengoba abalimi sebelungiselela ukubamba inhlanyelo, kuqakathekile ukuthi belandele izixwayiso ezethulwa yizanusi zomkhathi ngokuna kwezulu.
Uthe, “Abantu kumele benanzelele kakhulu ikakhulu lokhu esithi ngama-forecast, ikakhulu ama-7 to 10-day forecast. Yiwo azabe ebancedisa ukuthi benze malungiselelo bani mayelana lezifuyo, mayelana lasemasimini.”
Abantu abanengi bathi lanxa izulu lingaze line abalalutho lokulimisa lonyaka ngoba bafelwe zinkomo lamadonki kwaphela ngenxa yendlala lokusilela kwamanzi.
Ugatsha lukahulumende olubona ngezokulima olweAgritex lwazise izolo ukuthi eMatabeleland South kuphela sokufe Inkomo ezedlula inkulungwane ezilitshumi, 10,134.
Okumangalisa yikuthi ezinye inkomo ezikhanya sobala ukuthi azicakanga lazo ziyafa, osokudale ukuthi abanye banakanele ukuthi kulemikhuhlane ekhona.
“Lapha Inkomo zizatshiya abafuyi besenkingeni enkulu ngamaBP, sicela ololwazi ukuthi yimikhuhlane kumbe kuyini ancede,” kutsho isakhamuzi uFamona Ngwenya
UNkomo uthi ngempela imikhuhlane ngeke iswelakale, ikakhulu leyo ebangelwa yimikhaza.
EleZimbabwe liphakathi kwendlala ehlasele abantu abayizigidi phose eziyisitshiyangalombili, 7,7 million ebangelwe yikungani kuhle kwezulu nyakenye.
Ukuphuza kwalo lonyaka njalo sokudale ukuthi abanengi besabele ukuthi indlala le izaqhubeka njalo ngomnyaka ozayo lanxa nje izanusi zomkhathi zisithi izulu likhanya lizakuna ngemfanelo.
Your browser doesn’t support HTML5
Udaba Siluphiwa nguNtungamili Nkomo