Izulu lesiqotho eline ngoMvulo labangela umonakalo omkhulu endaweni zelizwe ezitshiyeneyo libulale abantwana abathathu ePlumtree bevela esikolo.
Ababili balaba bantwana bebevela esikolo seSevaka Primary School. Owesithathu ubevela eNdolwane Primary School, kubika iphephandaba leChronicle.
Omunye wabafileyo eSevaka ungcwatshwe ngoLwesithathu njalo isidumbu sowesibili sihanjiswe koBulawayo.
Ukhansila walindawo uMnu Morgen Ndebele utshele iStudio 7 ukuthi izakhamizi zithithibele ngemfa yabantwana laba kanye lomonakalo nje obangelwe yisiqotho lesi.
"Isiqotho sakhona baba lanxa ungumuntu omdala besingeke sikusize nxa sikuthole egangeni," kuchasise uMnu Ndebele.
"Ube mkhulu kakhulu umonakalo; izifuyo zifile njalo imizi eminengi idilikile abantu basele bengelandawo zokuhlala."
Your browser doesn’t support HTML5
Udaba lomonakalo odalwe lizulu elilesiqotho elibulele abantu okugoqela abantwana besikholo ababili