Ezinye zezakhamizi zaseDete zehlelwe yingozi yokudilikelwa yimizi kanye lezikolo kulandela ukuqothula kwezulu lesiphepho eline kusukela lisempondozankomo kwaze kwahlwa, qede latshiya abanye bengalandawo yokubeka amakhanda.
Ngokutsho kwezakhamizi zika ward 18, lapho isiphepho lesi esibikwa sihlasele ngamandla, abanye okugoqela abantwana lasebekhulile basesimeni sokudinga usizo lokudla, izembatho kanye lengalo yosizo lokwakha kutsha.
Umnumzana Kenny Sibanda oleminyaka yokuzalwa engamatshumi ayisithupha lanhlanu – 65, uthi kowakhe umuzi, isiphepho lesi sitshaye salothisa.
“Eyami indlu yi-two rooms, iphume amazenge wonke, salwisa-ke seliphelile khonapho ukuthi sibisele amazenge kodwa akulungisekanga kuhle ebusuku. Lekulaleni kubeluhlupho kakhulu ngoba siqonde ukulala kiwo umbheda uthanjiswe lizulu kunjalo ungazi lokutgi uzaqonda ngaphi.”
Omunye njalo okhalayo nguNkosikazi Liznet Dube wemangweni munye.
“Akulatho oluphilayo, konke kumanzi. Akulanto enhle ngoba amazenge onke aphume ayakuwa phansi, umduli phansi. Sisebunzimeni sikhuluma kanye asisakwazi lokuthi singaphephela ngaphi, singabantu nje njalo sikhulile asazi lokuthi singabamba ngaphi.”
Esinye njalo isakhamuzi seNtuya, uMnumzana Dug Sibanda, uthi behlelwe yile ingozi bona bengekho ngekhaya besekonzweni, wafica umuzi labomakhelwane sekulucaca.
“Uphahla lonke luthethwe lwalahlelwa phandle, impahla zimanzi. Isikhathi ngifika ngivela enkonzweni, ngifice abantu bebuthene kokunye okungamadumba.”
Ongukhansila walumango,uMnumzana Stanely Torima, uthi izikolo ezigoqela iSt. Francis Primary School leDetema Secondary School, ziqhuphulwe uphahla, kwadabuka ingwalo njalo kwaqamuka imitshina yokufunda, ama-computers.
“Amaroofs eSt Francis athethwe ngumoya uphahla. Phakathi bekule funrniture, ama computer, amabhuku abantwana besikolo, kodwa amabhuku lawa asemanzini.”
UTorima ucela ukuba abantu belule ingalo, esithi izinga lenswelo kulumango liphezulu kakhulu.
“Kuzabanzima ukuthi bephangise ukwakha ezinye izindlu ukuze befihle amakhanda. Ngiyafisa ukuthi uhulumende abuye eDete ezoncedisa abantu bonalaba ikakhulu eMtuya kanye lezikolo esiphambanisekileyo, ukuqala kuzabanzima kubabalisi labafundi.”
Umphathintambo wesabelo lesi uMnumzana Richard Moyo, utshele lumsakazo ukuba ubengakasizwa lesisehlakalo, kodwa uthembise ukuba phezu kwalokhu ngokutshetsha besebenzisana labohlangothi lokunanzwa kwabathinteke engozini ezinje olwe Civil Protection Unit kanye leHwange Rural District Council.
Isehlakalo seDete silandela njalo enye inkemenkeme eyenzakala esihonqweni seHwange National Park lapho ababona ngokukhuselwa kwemvelo abe Zimbabwe Parks and Wildlife Management Authority bebika ukuba sekufe indlovu ezifika phose ikhulu kusukela ngenyanga kaMpandula, kwafa lezinye inyamazana eziqoqela inyathi ngesizatho sokuguquka komkhathi i-climate change ebangela ukusweleka kwamanzi kanye lamadlelo.
Kunje eleZimbabwe limanyene lamanye amazwe womhlaba emhlanganweni wamazwe womhlaba, wokuhlaziya ngezokuguquka komkhathi, oweUnited Nations Climate Change, kwele Dubai kuxoxoswana ngenhlupho ezifana lalezi kanye lendlela zokuzivikela kulokhu.