UTalent Moyo odabuka eKezi loFelix Nkomo ozalwa eTsholotsho babulewe ngabantu eDiepsloot ngoLwesihlanu kusihlwa kwele South Africa besiya emthandazweni endaweni okukhonza khona amapostoli akunhlanganiso ye-Imisebenzi Yamapostoli Church.
Bagandwe ngamatshe batshiswa ngamathaya emota ngabantu abathi bebedinga amasela abathwalise nzima eDiepsloot.
UMoyo loNkomo kubikwa ukuba babhubhe bephika ukuba bangamasela njalo batshengisa abababuleleyo izembatho akade bezithwele besiya thandaza.
UMnu. Mehluli Ncube oku-Imisebenzi Yamapostoli Church uthi ababili laba babulewe njengalokhu okwehlela umuyi uElvis Nyathi, owagangadwa ngamatshe watshiswa eDiepsloot engonanga lutho.
UNcube uthi sebedinga imali efika inkulungwane ezingamatshumi amabili zama rands ukwenzela ukuhambisa izidumbu zabo eZimbabwe.
Kasenelisanga ukukhuluma lamapholisa esabelweni seGauteng ngoba bebengaphenduli incingo labomakhalekhukhwini.