Umgcinisihlalo womanyano we African Union Commission, uNkosazana Dlamini-Zuma uthi ukutshaywa kwabokuza kwele South Africa kubangelwa yizikliwi. Lokhu kulandela ukuqhubeka kobudlwangudlwangu kwele South Africa, ikakhulu edolobheni le Durban.
NgoLwesibili amapholisa avimbe idolobho lonke kulandela loludlakela oselutshiye abantu abalitshumi laskhombisa befile, abanye babo betshiwe ngomlilo bephila. Lokhu kulandela imbiko yenkosi uMnu. Goodwill Zwelithini yokuthi bonke abokuza kumele basuke kwele South Africa.
Lanxa ephinde wayiphika limbiko indodana kaMongameli Jacob Zuma, uEdward, laye ugcizelele limbiko esithi abokuza abasebenza ukulinda bayemukela imali encinyane okucunula izizalwane zakwele South Africa.
Kodwa isikhulumeli sikaMongameli Zuma, uMnu. Mac Maharaj uthembise abokuza ukuthi bengakhathazwa yimbiko le ngoba ilizwe le South Africa liyemukela bonke abantu nxa belamaphepha okuhlala lokusebenza okusemthethweni.
Ekhuluma ese Washington DC ngoMvulo, uDlamini-Zuma uthe lobu budlowangudlwangu sebukhathaza ilizwe lonke.
Isizalwane seZimbabwe esihlala eDurban, uNkosazana Nsengu Ndlela utshele iStudio Seven ukuthi sebehlala bezivalele ezindlini ngoba besesaba lobu budlwangudlwangu.
Your browser doesn’t support HTML5
Ingxoxo loNkosazana Nsengu Ndlela