EleZimbabwe lithi izizalwane zalo ezihlala kweleBotswana kumele ziqaphele ngesikhati kuqhutshwa ukhetho elizweni leli okulamabandla aphikisayo athi ibandla leZanu PF lingenela kukhetho lolu.
Umbiko lo wethulwe ngomele eleZimbabwe kweleBotswana, uMnu. Henry Mukonoweshuro, othi kulemibiko eveza ukuba amabandla aphikisayo achothoza ibandla leZanu esithi lingenela kukhetho oluzaqhutshwa ngoLwesithathu. Abamabandla aphikisayo bathi kumele amazwe omhlaba ahlolisise amalungiselelo okhetho lolu. Lokhu kuza ngemva kokuba amapholisa avikele abasekeli bamabandla aphikisayo ukuthi bayetshengisela ewofisini yommeli weZimbabwe ngempelaviki.
Amabandla aphikisayo aqina ngokuthi eleZimbabwe lizama ukuncedisa ibandla elibusayo eleBotswana Democratic Party (iBDP) ukuthi iqilibezele kukhetho oluzayo.
UNkosazana Mpho Pheko, isikhulumi sebandla eliphikisayo eleBotswana Congress Party, uthi izehlakalo ngaphambi kokhetho zitsho ukuthi kumele amanye amazwe afake ilihlo lokhozi kukhetho lweBotswana.
"Sifuna umhlaba wonke jikelele ukuthi ufake ilihlo kweleBotswana. Siyaziwa njenge lizwe elihlonipha umbuso wabantu ngabantu, kodwa okuyenzakale emalangeni kusitshiya silembuzo eminengi."
Amapholisa avale ngci phandle kwesigodlo seZimbabwe kweleBotswana
UMnunzana Phenyo Butale obemele ibandla leUmbrella for Democratic Change njalo onguye obale umalayezo okade ubhekiswe kuhulumende weZimbabwe, uthi balesiqiniseko sokuthi kukhona okutshaya amanzi phakathi kwebandla leZANU PF leleBDP.
"Sitshengisele ngoba sile mbiko eqinileyo ukuthi eleZimbabwe lizama ukuncedisa abangane balo ngapha ukuthi baqile."
Abakubandla leZanu PF leleBDP bayakulandula lokhu besithi amabandla aphikisayo azama ukuvala amehlo abantu abazavota ukuthi kucatshangwe ukuba kulobuqili kukhetho lolu. Kusenjalo, amapholisa atshele intathelizindaba ukuthi amabandla aphikisayo abengatholanga imvumo yokutshengisela njengalokhu okulawulwa ngumthetho wakulelilizwe. UButale yena uthi okwenziwe ngamapholisa ukubavimba ukuthi bayetshengisela akukho emthethweni.
"Basihlangabeze ngokusihlukumeza, besithathela ilungelo lethu lokutshengisela. Thina sikwazi ukuthi uma udinga imvumo yokutshengisela, uyidingela ukuthi uthole ukuvikelwa ngamapholisa, hatshi ukuhlukuluzwa."
EleBotswana lilungeselela ukhetho ngesikhathi isimo somnotho singamanga kahle njalo kulokudungeka kwemizwa lokufuthelana.
UMongameli Mokgweetsi Masisi ukhankasela ithemu lesibili njalo lingelokucina esembusweni. Uzabhekana labanye abathathu abakumabandla aphikisayo.
Laba bagoqela uMnunzana Dumelang Saleshando weBCP, uMnunzana Duma Boko, ommele ibandla leUDC kanye loMnunzana Mephato Reatile yena ophuma kubandla elisekelwa ngowayengumongameli, uMnunzana Ian Khama.
Ocubungula ezombusazwe kweleBotswana, uMnunzana Zibani Maundeni, isikwicamfundo ekolitshini le-University of Botswana, uthi lonyaka kulakho ukuthi kungabi lebandla elithola amavoti ayeneleyo ukuthi libuse lodwa.
“Kungenzeka, njalo kuzakutsho ukuthi amabandla atshiyeneyo ahlangane akhulumisane ukuthi azabusa njani.”
Kodwa uMnunzana Effie Dlela-Ncube uthi noma nje amabandla aphikisayo engenza ngcono, ukhangelele ukuthi ibandla leBDP liqhubeke libusa.
“Ungathi iqembu elaphatha lokhe kusaka ekutholeni uzibuse, lizaqhubeka libusa. Kanti ke njalo sekulokwanda kokuphikisa, banengi abantu abalensolo. Kungenzeka amabandla aphikisayo ayenze ngcono kulalokho akade kukhangelelwe.”
Inhloli ezivela kunhlanganiso ezitshiyeneyo ezigoqela eyeAfrican Union, Southern African Development Community kanye leCommonwealth sezifikile ukuzebona ukuba luqhutshwa njani ukhetho lolu.
Ukuvota okuqala ngaphambili kokhetho kusenzelwa abazavotisa kukhetho kanye labahlala ngaphandle kwelizwe, luqhutshwe kumaviki asanda kwedlula. Kube lokukhonona ngokusilela kwamaphepha okuvotisa.
Kodwa inhlanganiso eqhuba ukhetho eye Independent Electoral Commission ithi konke sekulungele ukuthi kuvotwe ngoLwesithathu. EleZimbabwe selichothozwe ngabaphikisayo kweleSouth Africa, Mozambique lamanye amazwe athi langenela kukhetho lisekela ibandla elibusayo.