Izizalwane zeZimbabwe ezisebenza lokuhlala kwele South Africa zithi umnyaka ka 2014 ubunzima okwamagama. Inengi lithi ukungamanga kuhle komnotho, ukusilela kwemisebenzi kanye lemali ngezinye zezinto ezibabuyisele emuva kakhulu lonyaka.
Izizalwane zeZimbabwe zithi bezithwele amagabha avuzayo ngezanhluphe lezangikhathaze ze mpilo ku 2014. Isizalwane seZimbabwe unkosazana Prudence JZ Mpofu uthi impilo ibinzima kwabazisebenzayo kanye labaqatshiweyo.
Uthi akusakhulunywa ngalabo abangasebenziyo njengoba bekunzima ngitsho lakulabo abavame ukuba siza.
Njengamazwe onke omhlaba, eleSouth Africa lalo lonyaka lihlangane lobunzima obukhulu kwezomnotho. Inkampani exwayisa ngezomnotho eye Moody’s Investors Service ibike ukuthi kulokuntengantenga kwesimo emabhanga amahlanu ayiwo amakhulu alizweni. Lokhu kukhokhelele ekuthini linhlanganiso yehlise imiklomelo yohlonzi lwala mabhanga.
Ngenxa yokoma kwezomnotho ugatsha lwezemali lubike ukuthi intuthuko ebikhangelelwe kwezomnotho izakwehla isuka kokubili ekhulwini (2.7%) isiya kokunye ekhulwini (1.4%).
Kwabebedinga imisebenzi lakho kubenzima njengoba kungelamisebenzi elohlonzi edaliweyo lonyaka.
Esinye njalo isizalwane seZimbabwe umnumnzana Dumisani Nleya uthi okunye okuhlukumeze izizalwane zeZimbabwe lonyaka zincwadi zemvumo yokuhlala elizweni. Uthi ukubotshwa kwalabo abangelazo lezingcwadi bekuphambili ukwedlula emnyakeni kantike lalabo abaphiwa amapermit bebegijima besiyale lale ngemva lokuphiwa elinye ithuba lokufaka izicelo zokuthola amanye aweminyaka emithathu.
Umnumnzana Nleya uthi inengi liphinde lephulwa inhliziyo ludaba lwenkokheli ezikhethwe yiZanu pf ukuthi zikhokhele ilizwe.
Unkosikazi Mpofu yena uthi njengoba uhulumende we South Africa esekubeke kwacaca ukuthi ngo 2017 abeZimbabwe abaphiwe amapermit oxolo kufanele babhekise amabombo emuva, kuhle abantu beqale khathesi ukulungisa isimo sezomnotho lezombusazwe ekhaya.
Abanyeke ngabathi njengoba kungalahlwa mbeleko ngokufelwa balethemba lokuthi u 2015 ubaphathele impumelelo.
Ngimele Istudio 7 eJohannesburg kwele South Africa nginguBenedict Nhlapho
Your browser doesn’t support HTML5
Udaba Silethulelwa nguBennedict Nhlapho