Kuhlelo lwezizalwane zeZimbabwe ezihlala kwamanye amazwe, ngoLwesibili sixoxe loMnu. Mthokozisi Ndlovu ohlala eFort McMurray ebhidlizwe ngumlilo omangalisayo olokhe usidla ubhedu esabelweni seAlberta eCanada.
UNdlovu ngomunye wezizalwane zeZimbabwe ezifika phose amakhulu amabili ezithuthe edolobheni leli elidilizwe ngumlilo lo ocatshangelwa ukuthi kawukazi uhlasele lesosabelo kangaka selokhe sabakhona.
Okwamanje uhlezi lemuli yakhe edolobheni ele Edmonton lapho abhadalelwa khona nguhulumende. Akwaziwa ukuthi uzabuyela nini endlini yakhe eFort McMurray. UNdlovu uthe, “Wathi uqalisa ukuvungama umlilo lo satshelwa nguhulumende lalabo abakhangela lokhu ukuthi sibesiwukhangele ukuthi wenzani. Kuthe ngokuhamba kwesikhathi wavungama satshelwa ukuthi sisuke siye edolobheni le Edmonton. Kulapho esesihlala khona njalo esincediswa khona nguhulumende.
“Asikwazi ukuthi sizabuyela nini eFort McMurray. Ngokuzwa kwami indlu yami kayizange idilike kodwa ezabanye zadilika okumangalisayo. Sizabuyela uhulumende angasitshela ukuthi sense njalo.”
UNdlovu uphinde wathi owkamanje akasebenzi njalo wenzelwa okunengi nguhulumende obhadala lemali yalapho abahlala khona. Kodwa-ke ulethemba lokuthi konke lokhu kuzedlula abuyele endlini yakhe.
Your browser doesn’t support HTML5
Ingxoxo Esiyenze LoMnu. Mthokozisi Ndlovu