Ngemva kokubumba inhlanganiso ye ZCTU ngomnyaka ka 1981 uhulumende waba lokusebenzelana lenhlanganiso zezisebenzi engena imbuthano yabo yelanga lokunanza ukuqhakatheka kwezisebenzi eyama May Day.
Lokhu kucine kuphazamiseka kulandela indubo ezibhekane labantu kwezenotho zibangelwa luhlelo lwe ESAP kwafuqa izisebenzi ukuba ziqale ukutshengisela lokukhalala imisebenzi.
Umnumzana Masimba Kuchera ocubungula ngezombusazwe uthi lokhu ngokunye okwacina kusenza I ZCTU iphatheke ekubunjweni kwebandla eliphikisayo ele MDC kwabangela ukuba kube lokungethembani phakathi kukahulumende layo wacina ebumba ezinye inhlanganiso ezihambelana laye.
Umnumzana Promise Mkwananzi owake wakhokhela inhlanganiso zezifundi ekolitshini le University of Zimbabwe lakunhlanganiso ye ZINASU uthi ukusebenzelana phakathi kukahulumende izifundi lenhlanganiso zezisebenzi kuqakathekile emhlabeni wonke noma kusalenkinga kuleli.
Osaphethe isikhundla sikanobhala jikelele we ZCTU umnumzana Gideon Shoko uthi ukusebenzelana lokhe kusasekhona ikakhulu enkundleni ye Tripartite Negotiating Forum. Uthi bavumelene kulinkundla kusikhatshana esisanda kwedlula babhalelana phansi izinto eziqakathekileyo ezimele zenziwe okugoqela inguquko edingakalayo emthweni wezisebenzi owe Labour Act ethi noma kunjalo izivumelwano ezinje zimele zilaulwe ngumthetho. Ethi njengenhlanganiso abazange beke bama ukumema uhulumende embuthanweni yabo yama May Day.
Uhulumende ubikwa ethi ukuphatheka akwenzayo ku Tripartite Negotiating Forum kunye lokuguqula umthetho we Labour Act ngo Lwezi nyakenye kukhomba ukuba uzinikela kudaba lwezisebenzi.
Umnumzana Nixon Nyikadzino obona ngenhlelo zenhlanganiso ezimeleyo eye Crisis in Zimbabwe Coalition uthi sokudingakala ukuba kusetshenzelwanehatshi I ZCTU lohulumende lezifundi kuphela kudaba lokulungisisa ilizwe:
Ele Zimbabwe libhekana lendubo ezigoqela ukugunyulwa kwezisebenzi mahlayana, ukuvalwa kwamankampani ahlanganisela amafekithali okuqubekela phambili kusenzakala lenani labasakhulayo eliya lisanda lingatholi imisebenzi.
Your browser doesn’t support HTML5
Udaba lwezisebenzi siluphiwa nguMark Peter Nthambe