Inkokheli yenhlanganiso zezisebenzi zikahulumende, ikakhulu ezababalisi, ikhuthaza uhulumende ukuba aphange alungisise imithetho yokukhulumisana kundaba zeholo kanye lendlela ezisebenza ngayo, okufana lowe Public Service Act, ukuze ihambelane lesisekelo esitsha sombuso.
Lezi nkokheli zibeka umlandu indlela limithetho elotshwe ngayo, bethi ubuthakathaka njengoba yelelekelela kakhulu kuhulumende, isenza abe malutshwana amandla abo okukhulumisana ngezeholo njengezisebenzi, okubenza baphenduke abaphathisayo nje hatshi ukuphatheka ngokugcweleyo kizo.
Kuyilesi simo, semithetho ebuthathakathaka, esenza behluleke ukuphuma lempumela esuthisa izisebenzi sikhathi sonke lapho kungenwa imihlangano yokukhulumisana phezu kweholo kuveza omunye walezi nkokheli yababalisi ye Zimbabwe Teachers Association -ZIMTA, umnumzana Sifiso Ndlovu.
Uthi uNdlovu lalokho okutshiwo nguhulumende kudaba lokulungisiswa kwemithetho elawula izisebenzi zikahulumende, kungacaci ekuthini kuzathatha isikhathi esinganani ukuqgiba umsebenzi wokulungisisa imithetho elawula ukusebenza kwezisebenzi, ihambelane lesisekelo esitsha sombuso.
Lesi simo uNdlovu uthi yiso esesisengezelela ekuthini bangaze balujaha udaba lokukhalala umsebenzi besesaba ukuba uhulumende uzasebenzisa imithetho ekhona esekela yena ukujezisa labo abaphatheka kikho njengalokho osekwenzakale kubodokotela.
Lo ngumbono osekelwe ngokhokhela eyinye njalo inhlanganiso yababalisi eye Progressive Educators Union of Zimbabwe – PEUZ umnumzana Wilson Makanyaire othi imithetho ekhona ipha amandla uhulumende ukuthi enze santando kuzisebenzi zakhe.
Uthi ukhathazekile uMakanyaire ngoba lalomhlangano asebethe bawungena lomphathintambo wezisebenzi zikahulumende, unkosikazi Prisca Mupfumira, kunsukwana ezisanda kwedlula, ungavezanga ukuba usukusibanga siphi umsebenzi wokulungisiswa kwemithetho yezisebenzi zikahulumende, ukuze ihambelane lesisekelo esitsha sombuso.