Izisebenzi zikahulumende ezinengi zikhala ngokuthi azikatholi iholo lazo ngemfanelo, ngesikhathi umnotho welizwe uqhubeka usadalala.
Ezinye izisebenzi ezikhulume lomsakazo weStudio 7 kanye labameli bazo abakunhlanganiso ezitshiyeneyo bathi okwamanje bathole ama-allowances abawahlawulwa ngedola laseMelika kuthi iholo ngokwalo abalibhadalwa ngemali yakuleli iZimbabwe Gold kumbe iZiG alikangeni emabhanga.
Kulabanye njalo abathi kokubili, i-allowance leholo abakakutholi.
Bathi uhulumende ukhanya usesehluleka ukubatholisa imfanelo zabo nanku useze waphungula isilinganiso samafutha ezimota anikwa ezinye izisebenzi njalo wamisa inhlelo athi zitshaphaza imali.
UMnu Mlungisi Tshuma olipholisa ngomunye wabakhala ngokuthi abakaholi.
‘’Kulinyanga sithwele nzima imali lokhe ingakangeni. Sesizame sazama ukukhangela ukuba kungabe kungalani kuma account ethu kodwa lanamhlanje akulalutho. Sibuza emabhanga bathi uhulumende kakafaki. Ngithole eyama USD kodwa ama ZiG lokhe engakangeni,” kutsho uTshuma.
Umongakazi uNkosikazi Nompilo Dube ukusimo esifanayo.
UNKosikazi Dube uthi, ‘’Imali esayitholayo ngama US dollars kodwa ama ZiG asikawatholi. Kade silindile lokhu akukaze kwenzakale nyanga zonke kuyasimangalisa ukuba kuyini okungabe kuhlupha.’’
Omunye njalo okhala ngodaba lunye ngumbalisi uNkosikazi Lithini Mabhena.
“Lobanje abanye besithi sebethole ama ZiG mina angikatholi lama US dollars akhona. Okwalonyaka kunzima. Nxa ngisiya ebhanga bathi ngibuze kuhulumende kodwa asitholi mpendulo,” kutsho uNKosikazi Mabhena.
Abenhlanganiso ezimela izisebenzi zikahulumende ezigoqela eyeZimbabwe Teachers Association, Zimbabwe Nurses Association leyeAmalgmated Rural Teachers Union bakufakazile ukuthi ngempela izisebenzi azikatholi izimali zazo ngemfanelo kulinyanga.
UMnu. Thembakuye Moyo yisikhulumeli senhlanganiso emela ababalisi bemaphandleni eyeARTUZ.
“Abanengi abasebenzayo abangakatholi imali zabo. Kuyamangaza ukuba kuyini okubangela ukuba kubenje bona besithi balemali enengi abayithi yi surplus.”
Esinye isisebenzi sikahulumende esikhangelane lokuholisa izisebenzi sitshele lumsakazo ukuthi udubo olungabe lubangela ukuphuza kweholo yimitshina yamabhanga.
Sehlulekile ukukhuluma lomphathintambo wezemali uMnu. Mthuli Ncube, kanye lomphathintambo obona ngendaba zezisebenzi uMnu. July Moyo.
Ukuphuza kweholo lezisebenzi kuza ngemva kokuba uhulumende ehlise isilinganiso samafutha ezimota awapha ezinye izisebenzi zakhe futhi wamisa imihlangano eqhutshelwa phandle kwelizwe.
Ibhanga leReserve Bank of Zimbabwe kunyanga ezimbalwa ezedluleyo lehlisa isisindo seZiG ngokuyisilinganiso samatshumi amane lantathu ekhulwini, 43 percent, okubangele ukuthi iholo lezisebenzi ligugudeke.
Mhlaka 13 wayonale inyanga uhulumende walobela ingatsha zakhe incwadi ezazisa ngodubo lwemali abhekane lalo.
Izisebenzi zikahulumende ezinye zihola imali efika amadola angamakhulu amathathu, US$300, kuthi enye yayo engamakhulu amabili amadola, US$200, ibhadalwa ngeZiG.