Izisebenzi zikahulumende zehlukane ngemibono phezu kokuba kukhalalwe imisebenzi na kumbe hatshi njengalokho okutshiwo ngezinye inhlanganiso ezimela lezi zisebenzi ezikumanyano we APEX Council kulabanye abathi kasikho isizatho zokwenze lokho njengoba ingakabi khona inking engabangela ukwenze njalo.
IStudio Seven ikhulume lezinye zenkokheli zalezi nhlanganiso phezu kokuba kungani bengazange baphumelele ukubopha isibopho sinye ngemva kokungena umhlangano we APEX Council izolo.
Umqondisi wenhlanganiso ye Zimbabwe Teachers Association – ZIMTA uMnumzana Sifiso Ndlovu uveze ukuba kasikho isizatho okwamanje sokuba kukhalalwe umsebenzi njengalokho okutshiwo ngabanye.
UNdlovu uthi osekuvela sobala yikuba ezinye zezizatho esezithutsha zivelela kwezinye inhlanganiso ezimela izisebenzi zikahulumende, kakhulukazi ezababalisi, zitshengisa ukuba zikhona ezinye injongo angazivezanga esezifuqwa ngabanye ngendlela yokuqumbaqumbana kuzwanwa amandla, osekusolwa ngabanye.
Uyakuvuma uNdlovu ukuba lezahlakalo zebandleni elibusayo le Zanu Pf ,lapho kuxotshanwa khona kuphazamisa ekuqhutshweni kwenxoxo phakathi kukahulumende lezisebenzi zakhe.Okhokhela enye yenhlanganiso yababalisi ye Progressive Educators Union of Zimbabwe – PEUZ umnumzana Wilson Makanyaire uthi lanxa kuzabe kube lokuvumelana phezu kwesinqumo phezu kokuba kukhalalwe umsebenzi loba hatshi,uhulumende akangalibali ngoba zilakho ukukwenze lokho ngendlela yokutshengisela ukukhonona kwazo.
Zivumelene lezi zisebenzi ukuba kumele ziqhubekiseliswe phambili lezo ngxoxo-nkulumo ebeziqhutshwa phakathi kukahulumende lezisebenzi zakhe anduba kukhalalwe umsebenzi.
Inkokheli zalezi nhlanganiso iveze ukuba kunje baphakathi komsebenzi wokukhulumisana lamalunga enhlanganiso zabo ukubazisa impumela yalomhlangano owenziwe izolo.
Intathelizindaba yethu uMavis Gama usethulela loludaba ngokugcweleyo.
Your browser doesn’t support HTML5
Udaba Silethulelwa nguMavis Gama