UMongameli Robert Mugabe uthi amazwe afana leBhilithani leMelika kamelanga angenele kudaba lwesivumelwano seGlobal Political Agreement, esithi ukwenza lokhu yibuwula obukhulu.
Inkokheli yamazwe womabili la ihlezi isola uMugabe ngokwala ukugcwalisisa isivumelwano lesi, sona esiyinsika kahulumende womanyano phakathi kweZanu PF leMDC.
Kodwa ekhuluma emhlanganweni awenze lezinduna eKariba ngoLwesine uMugabe uthe abamazwe la yiziwula ezimele zitshiyane lendaba zeZimbabwe.
Iphephandaba leHerald libike ukuthi umkhokheli weChiefs Council uMnu Fortune Charumbira utshele uMugabe ukuthi inkokheli yosiko ifuna eqhubeke ebusa ngoba isuthiseka ngombuso wakhe.
Enye yalezi nduna ethiwa nguMusarurwa ibikwa ikhuthaze uMugabe ukuthi abuse aze ayekufa.
Ngokwethula amazwi la, izinduna lezi ziveze sobala ukuthi zisekela ibandla leZanu PF lanxa isahluko 14 sesivumelwano seGPA sikubeka sobala ukuthi inkokheli yosiko akumelanga isekele uhlangothi kwezombusazwe.
Umeli weGwanda North edale lephalamende njalo elilunga leMDC ekhokhelwa nguMnu Arthur Mutambara uMnu Thandeko Zinti Mnkandla usole kakhulu isenzo sezinduna lezi.
Amazwi akhe agcizelelwe ngowake waba ngumeli weNkayi edale lephalamende uMnu Abednico Bhebhe.