Abazali bathi sebekhathele ngohulumende oyabe elokhu esithi akula mntwana ozaxotshelwa ukungabhadali inhlawulo yesikolo njalo linhlawulo ayizukukhwezwa kodwa abaphathi baqhubeka bengezelela imbadalo yama school fees santando kungela nyathelo elithathwayo ikakhulu ngalesisikhathi izisebenzi zibambe ingqamu ngasebukhalini bayo ezinye zilokhu zisalinde i-bonus ya nyakenye.
Ugatsha olubona ngezemfundo luthi akulamntwana ozaxotshelwa ukungabhadali indleko zesikolo njalo limbadalo ayizukukhwela kodwa abazali bathi kade bayizwa ihlatshelwa lingoma kodwa kungela mpumela.
Bathi izikolo zikhwezile indleko zesikolo lanxa inengi labazali eliqhatshwe nguhulumende lilokhu lisabheke ngawayizolo lilinde iholo lebonus.
Unkosazana Melody Siwela, olabantwana ababili, uthi lumnyaka umqalele kubi ngoba ngemva kokudla ikhefu engajabulanga emelele imali lalamhla ulokhu esamelele ibonus okuyiyo avame ukuzijabulisa ngayo lemuli yakhe kuthi ingxenye ikhangele indleko zesikolo lapho zivulwa.
Uthi akasathembi lutho oluphuma kuhulumende kungakho kazukumangala lapho abantwabakhe bexotshelwe ukungabhadali.
UNkosikazi Charity Ntubeni, ongumzali, uthi yena umangele esesizwa kuthiwa isikolo somntanakhe sikhweze inhlawulo yena uhulumende esithi lokhu akukho emthethweni.
Imbiko ithi izikolo ezingasi zikahulumende sezikhweze indleko yesikolo ezithi ziyifuna yonke yenele. Kuthiwa abazali abangenelisi lokhu bayatshelwa ukuthi bayekweboleka ngaphi imali yona ebiselwa isizele.
UNkosikazi Ntubeni uthi lokhu yikubamba abazali ngomphimbo njalo abalaqiniso ukuthi budlelwano bani obuphakathi kwabaphathi lenhlanganiso lezi ezibolekisa imali.
Izikolo zibikwa zengeze indleko yemfundo ngalumnyaka ezigoqela iMtshabezi eGwanda esuke kumali phose amadola alikhulu amahlanu $490 isiya phezu kwamakhulu amahlanu amadola - $530.
Isikolo seSibanesezwe koBulawayo sibikwa sikhwele sisuka kumakhulu amahlanu sisiya kumakhulu ayisithupha amadola -$600. Lanxa abasebenza kwezemfundo bebeke baphatha udaba lokukhalala umsebenzi, loludaba luthule ngemva kokuthi bathole iholo lebonus ngeviki ephelileyo kungaziwa ukuthi iyozala nkomoni lapho ithemu iqhubeka njengoba bevele bengajabuli ngeholo labo. U Nothando Sibanda usipha loludaba.
Your browser doesn’t support HTML5
Udaba Silethulelwa nguNothando Sibanda